Aarhus: Kalaallit Nunaat kulturikkut pikialaartitsinermi Aarhusimi peqataavoq
Kalaallit qulit umiatsiaq kivillugu ersukkiutissavaat 500 meterinillu ingerlaassallutik. Umiatsiaq taanna Kalaallit Nunaat Savalimmiullu sinnerlugit ingerlanneqassaaq.
Aarhusip vikingeqarnerup nalaanit oqaluttuassartaa umiatsiap ersukkiunneqarneratigut takutinniarneqarpoq, umiatsiallu pinnersarneqarsimasut atorlugit Aarhusimut ullumikkut tunngasut takutinniarsarineqarluitk.
Kalaallillu Aarhusimi Illuanni pisortap Jørn Holbechip tamanna pissarsiaqarfiulluassangatippaa:
- Pisussat akornanni annikitsuinnarmik ilanngussaqarpugut. Umiatsiavulli kusanarnerpaatut nalilerumavakka. Inuit ilaat kalaallisuunik atukkersorsimassapput, inuillu tamanna soqutigilluarumaaraat isumaqarpunga, Jørn Holbech KNR-imut oqarpoq.
Kalaallit Nunaat pillugu nittarsaassilluarneq
Illoqarfik kulturikkut pikialaartitsinermi Europami ukiumi aalajangersimasumi pingaarnerpaajusussamut suliniut EU-mit 1985-imiilli aaqqissorneqartarpoq. Europami illoqarfiit assigiinngitsut immikkut maluginiagassaanissaat siunertaavoq.
Naak Kalaallit Nunaat nalunngisatsitut EU-mut ilaasortaanngikkaluartoq, illoqarfimmi aalajangersimassumi kulturikkut pikialaartitsinermut atatillugu Kalaallit Nunaata nittarsaanneqarneranut pingaaruteqarpoq, Danmarkimi innuttaasunut aamma nittarsaassinertut isigineqarsinnaalluni, Jørn Holbech oqarpoq.
- Kalaallit Nunaannut tunngatillugu Danmarkimi isummanik pigiliutiinnakkanik ukiup naalernerani allannguilaarsimanissarput naatsorsuutigaara. Oqaluttuanik Kalaallit Nunaannut tunngasunik nuannersunik oqaluttuarinninnikkut tamanna pisinnaavoq, Jørn Holbech oqarpoq.
Aarhusip kulturikkut pikialaartitsinermi Europami ukioq manna illoqarfinni pingaarnersaattut toqqarneqarnera pillugu DR-ikkut aallakaatitsisoqarumaarpoq.
