Pisortanut akiitsullit inatsisitigut maanna akiliisinniarneqalerput

Tamatta immikkut agguaqatigiissillugu 22.000-it koruunit missaannik pisortanut akiitsoqarpugut, kommuninut Namminersorlutillu Oqartusanut akiitsut matumani pineqarlutik.

Innuttaasut akiitsutik akilertuugunikkit Nunatta karsia avataaniit atorniartariaqassanngikkaluarpoq, Naalakkersuisullu suliniutinut assigiinngitsunut aningaasaliisinnaassuseqassagaluarlutik.

Innuttaasulli ilaat akiitsoqartuarsinnarput, akileraarnermut akiitsut akilerneqarneq ajorput, meeqqanut akiliutit, avinnermilu akiliutit akilerneqarneq ajorlutik, soorlu aamma innaallagiamut, imeqarnermut, kiassarnermut, ineqarnermut, pujoorfinnillu paaviaanermut akiligassat akilerneqarneq ajortut.

Tamannali tassa inatsisitigut maanna iliuuseqarfiginiarneqalerpoq.

Naalakkersuisummi siunnersuuteqarnermikkut akiliisitsiniartarnermi inatsit Inatsisartut upernaami ataatsimiinneranni sukateriffiginialerpaat.

Aningaasanik akiliinerup akiligassanut naammassissutaanissaanik pisortat itigartitsissuteqarsinnaanissaannik periarfissaqarnissaat siunnersuutikkut aamma anguniarneqarpoq.

Inuit inatsisitigullu pisinnaatitaasut pisussaatitaasullu akiliisarnissaq pillugu aningaaserivimminnik isumaqatigiissusiornissamut periarfissallit, pisortanut akiligassaminnik ingerlaannartumik akiliisarnissamik aaqqissuussineq aqqutigalugu akiliisalernissaat aamma anguniarneqarpoq.

Siunnersuut Inatsisartut marsip qulingiluaani ataatsimiinneranni siullermeerlugu oqallisigineqassaaq, apriilillu aqqaneq-aappaani akuersissutigineqarsinnaanissaa ilimagineqarluni.

Siunnersuut akuersissutigineqassappat ukioq manna juulip aallaqqaataani atuutilersinnaassaaq.