Pisortaasimasoq periarfeeruppaat

Ilulissani politiit Qaasuitsup kommuniani atorfikkaajusimasumik aningaasanik atornerluisimasutut pasisamik misissuinerat naammassereerpoq. Suliassaq inatsisitigut nalilersorneqareerluni, unnerluutiginnittoqarnissaa kommunimi sulisuusimasumut nalunaarutigineqartussaagaluarpoq. Pasineqartorli maanna sumiinnersoq politiit naluaat.
Allattoq Oline I. Olsen
oktobarip 03-at 2012 07:06

- Suliaq pillugu oqaloqatigerusukkatsigu ujarparput,  Ilulissani politiit pisortaat Karl Vinther oqarpoq, tassumali suliap inernerata maanna saqqummiunnissaa kissaatiginngilaa. Tassami politiit misissuinerminni paasisatik pillugit, angut pasineqartoq siullertut nalunaarfigerusuppaat. Atorfikkaajusimasoq ilumut aningaasanik atornerluisimanersoq imaluunniit allatut inerniliisimanerlutik politiit oqaatigerusunngilaat.

Qaasuitsup Kommuniani atorfikkaajusimasoq siorna novembarimi, aningaasanik atornerluisimasutut pasineqarluni politiinit tigusarineqarpoq.

Politiit Ilulissani sumiiffinni assigiinngitsuni misissuinerminni tillinneqarsimasut amerlanersaat nassaaraat.

Aningaasat pineqartut aamma tillinneqarsimasut suuneri pillugit politiit taamani paasissutisseerusunngillat, aamma ullumi taakku pillugit oqaaseqarusunngikkallarlutik.

- Piffissami qaninnermi angut oqaloqatigiumaarlutigu naatsorsuutigaarput, Ilulissani politiineersoq Karl Vinther oqarpoq. 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq