Pisortaanermut tamakkiisumik tapersiissuteqarput
Keld Askærip ukiut marluk sinnerlugit qullersarinerani tupinnaannartumik ilorraap tungaanut allanngoriartoqarsimasoq, sineriatsinni Nanortalimmit Uummannamut Royal Greenlandip suliffissuini pisortat arfineq-marluk ataatsimoorlutik allapput.
Suliffissuarni pisortat aamma isumaqarput, aalisartunut attaveqarneq pitsaanerulersimasoq, sulisullu pitsaasumik siunertaqarluartumillu pikkorissartinneqartalersimasut. Taamatuttaaq suliffissuup iluani attaveqatigiinneq, isumalluarneq ataatsimoortumillu anguniagaqarneq malunnarsisimasoq pisortat isumaqarput.
Suliffeqarfiup aqutsisui eqqissillutik sulisinnaanissaat kissaatigalugu suliffissuarni pisortat aamma allapput, taamaattorli Paaviaaraq Heilmannip Royal Greenlandimi siulersuisuni siulittaasunngortinneqarnera eqqaaneqanngilaat, tusarfiilli tutsuiginartut erseqqissaapput, suliffissuarni pisortat siulittaasumik toqqaanissaq suliassarinngikkaat, piginnittut tamanna suliassarimmassuk. Siulittaasortaarli sapinngisamik suleqatigilluarniarneqassasoq erseqqissaatigineqarpoq.
Paaviaaraq Heilmannili aalisartut piniartullu kattuffianni KNAPK-mi allaffimmi pisortatut ulluinnarni sulinermini, assersuutigalugu tunisassat akiinik isumaqatigiinniarnerni illuatungiliuttutut inissisimasarnera maluniarneqartoq tusarfiit tutsuiginartut erseqqissaatigaat.
Suliffissuarni pisortat ilaat oqaloqatigisarput tassaavoq, Sisimiuneersoq Lars Berthelsen, Royal Greenlandimi siulersuisuni sulisut sinnerlugit aamma ilaasortaasoq. Taanna isertuanani oqarpoq, piginnittut sinnerlugit Jørgen Wæver Johansen aamma Johan Lund Olsen ingerlatseqatigiiffinnik ingerlatsilluarnermik siulersuisunut takutitsinngitsut, immikkut ittumik ataatsimeersuartoqarnissaanik ataasinngorpat ullo´qeqqata siornagut nalunaaqutaq aqqanermut aggersaammata, siulersuisuni ilaasortat ilaasa tikillutik peqataasinnaanissaannik periarfissinngitsoorlugit.
