Pisoqaq nutaassamut aalajangiissusserusuppoq

Qaasuitsup Kommuniani pisortaanerup piffissami aalajangersimasumi atorfeqartitaanera februaarip naanerani qaangiutsinnagu, kommunalbestyrelsi massakkut atuuttoq taartissaanik pissarsioqqammerpoq:

- Massakkut pisortaasup kontraktia naasussaavoq. Tassalu kissaatigineqarpoq taassuma naanissaanut tamanut ammasumik pisortaanissamik pissarsiornissaq, Qaasuitsup Kommuniata borgmesteria, Jess Svane, Siumumeersoq taama oqarpoq.

Kommunalbestyrelsili aapriilip aappaani qinersisoqarpat taarserneqartussaammat, Inuit Ataqatigiit sinnerlugit kommunalbestyrelsimi ilaasortaq, Bendt B. Kristiansen isumaqarpoq pisortaanissamik toqqaanissaq kommunalebestyrelsip nutaap isumagisariaqaraluaraa:

- Imaattariaqarsorigaluarlugu kommunalbestyrelsi nutaaq, taannaasariaqartoq pisortassaminik, qanimut suleqatissaminik, toqqaasoq. Maannali tassa toqqaanissaanut periarfissinneqanngitsuulerpoq, Bendt B. Kristiansen oqarpoq, nangillunilu:

- Kisianni uggornartoq uaniippoq kommunalebestyrelsip nutaassap atuutilernissaa uungaralaannguanngortoq, kommunalbestyrelsi nutaaq oqartussaaffeqarnani pisortamik nutaamik atorfinitsitsisoqalermat. Periutsip piffissalersorneqarnera uanga assut uggorivara.

Kisianni tassa pisortaanissaq nutaaq kommunalebestyrelsimi ukiarmi eqqartorneqalermat ilaasortat ataasiakkaarlutik toqqaasinneqarput. Amerlanerussuteqartullu kissaatigisimavaat pisortaanermik nutaamik januaarip naanerani atorfinitsitsinissartik.

Ikinnerussuteqartut atorfinitsinitsinissaq qinersereernerup kingorna ingerlanneqarnissaa kissaatigisimagaluarpaat, ikinnerussuteqartunullu borgmester Jess Svane akuuvoq:

- Tassa toqqaassuugut. Aamma uanga nammineq nassuerutigissuara kissaatiginerpaanikuungaluarakku kommunalbestyrelsip nutaap nammineq ikkutereeruni pisortaanermik atorfinitsitsinissaa, Jess Svane oqarpoq.

Qaasuitsup Kommuniani pisortaanissaq marsip aallaqqaataaniit atorfinitsinneqassaaq.