Pisoq alianartoq: Angut utoqqaliarsaartoq Ittoqqortoormiineersoq ajunaartoq
Ittoqqortoormiit avannaata kangisissuani kilometerit 20-t missaannik ungasitsigisumiittumi sapaatit akunnerata siuliani tallimanngornermi unnukkut mannissartut ilaat angut utoqqaliarsaartoq innaarsummiit nakkarpoq.
Angut nakkartoq taanna ajunaarsimasoq, Kalaallit Nunaanni Politiit pigaartuisa pisortaat Anette Ostenfeldt ataasinngornermi ullaakkut ilisimatitsivoq.
- Ittoqqortoormiini politiit angummik nakkartoqarsimaneranik arfininngornermut unnuaani unnuap qeqqata qaangilaaraa kalerinneqarput, angullu taanna quaalluni nakkarsimasoq paasinarsivoq, Anette Ostenfeldt oqarpoq.
Ittoqqortoormiit inuisa pisoq eqqorneqaatigigaat
Pisoq Ittoqqortoormiit inuisa aliasuutigeqalugulu eqqorneqaatigigaat, politiit pigaartuisa pisortaat oqarpoq.
- Peqqinnissaqarfik kommunilu oqaloqateqarnissamik pisariaqartitsisunut tamanut ikiuigasuartussamik tarnip pissusianik immikkut ilisimasalimmik piareersimasoqartartoq nalunngilara, politiilli tamatumununnga piareersimasortaqartanngillat, politiit pigaartuisa pisortaat aamma oqarpoq.
