Pisiniat automatit atorlugit akiliisalissapput

Ujajaaniartarnerit taamaaliornikkut pinngitsoortinneqarsinnaalissapput, soorlu Kamik Nukøbimi ippassaq taamaaliortoqartoq:

- Nerriviit akileeriaatsimut safe-payimik taaguutilimmut naleqqussaleruttorpagut. Automati atorlugu akiliinermi aningaasat utertorineqartussat automatip nammineq isumagissavaa. Akileeriaaseq taanna Danmarkimi pisiniarfiit ilaanni atugaalereerpoq, Kamimmik piginneqataasoq Erik Brogaard KNR-imut oqarpoq.

Ujajaaniartarnerit pinngitsoortinneqarsinnaalissapput:

- Isumannaallisaaneq pingaartipparput. Sulisunut pisinianullu. Sakkulersorluni ujajaaniartoqaraluarpat aningaasanik tigoriaannarnik peqarnavianngilaq, Erik Brogaard oqarpoq.

Kamik Nukøbimi ippassaq ujajaaneq nakkutiginninnermi atortutigut Erik Brogaardip takoreerpaa, aalassassimaarutigalugulu:

- Sakkulersorluni ujajaanerit Danmarkimiit tusartuartarpagut, sulisunili ujajaaffigitittut nammineq takullugu assut qamuuna misigisaqarfigaara, sulisorlu sapinngisarput tamaat ikiussavarput, pisiniarfiutilik oqarpoq.

Pisiniat sulisorlu tarnip pissusiinik ilisimasalimmit ikiorneqarnissaat neqeroorutigineqarpoq, Dronning Ingridip Napparsimmavissuanit ikiorneqarnissaat neqeroorutigineqarluni.

Akileeriaaseq nutaaq apriilip 19-iani atuutilissaaq, pisiniarfiit akornanni Kamik Nunatsinni siullerpaalluni taamaattumik atuutilersitsissalluni.