Pisiffik isornartorsiorneqarpoq
Nipitittakkanit neqeroorutinut tunngatillugu, nipitittakkat nalingi, neqeroorutit naammattut pigineqarnersut kiisalu neqeroorutinut killigititaq pillugit Atuisartut siunnersoqatigiivinit misissuisoqarpoq.
Pisiffimmit erseqqissarneqarsimavoq neqerooruteqarnermi neqeroorutaasut pisinniarfiit toqqorsiviini pigineqartut nungunnissaata tungaanut neqeroorutit atuutissasut. Taamaakkaluartorli pisiniat amerlasuut neqeroorutit nungunneqareersimagaluartut neqeroorutaanngikkaluanik taarsiisinnaassarsimapput, tamatumani natsorsuutigisamik nipitsittakkanik neqeroorutinik atuisut amerlaneruneri tunngavigalugu.
Taamaakkaluartorli piffissap sivikitsup iluinnaani Pisiffiup neqeroorutinik atuutitsinera kiisalu nipitittakkat aningaasanngorlugit tiguneqarsinnaagaluarnerat pillugu erseqqissumik paasissutissiisimannginnera Atuisartut siunnersoqatigiinnit isornartorsiorneqarpoq.
Taamatummi neqerooruteqarnermi niuernermi inatsit malillugu neqeroorutit nipitikkallu nalingi naligiittussaapput. Tamannalu Pisiffiup nipitittakkanik neqeroorutaani atorneqanngilaq. Nipitsittagarmi ataaseq 2 koruuninik 50 øremillu naleqartussaagaluartoq pisiffiup neqerooruteqarnermini 25 ørenarmik naleqartippaa.
Atuisartut siunnersoqatigiivisa tamanna pillugu Pisiffimmut piumasaqarsimapput nipitittakkanik nioqqutissanik imaluunnit aningaasanngorlugu taarsiisinnaanissaq sivisunerusumik piffissalerneqassasoq.
Tamatumunngalu tunngatillugu Pisiffiup akuersineranit nipititittakkanik aningaasanngortitsisinnaaneq nioqqutissanilluunniit taarsiisinnaaneq ukiup naanissaata tungaanut sivitsorneqarpoq. Nipitittakkalu nalinga ataaseq 2 koruuninik 50 øremillu naleqartinneqassaaq.