Pisiffik isornartorsiorneqareerluni: Sapinngisarput tamaat sulivugut
Nunatsinni sullissinermi suliaqartut annersaasa ilaat Pisiffik A/S inuusuttuararpassuarnik sulisoqarpoq. Taakku aamma atuisut siunnersuisoqatigiivisa isornartorsiuinerat paasisinnaanerarpaat taamaattoq kukkusumik tunngaveqarnerarlugu.
- Aaaqqaatigalugu taarusuppara toqqaannartumik pisiniarfiutitsinnut taama Pisiffik A/S-mut atuisut siunnersuisooqatigiivi saaffiginnissimasuuppata pitsaanerusimassagaluarmat tusagassiutit aqqutigalugu naammagittaalliuteqannginnermi. Toqqaannartumik oqaloqatigiinnikkut pineqartup isummanik paarlaasseqatigiiffiusumik ingerlanneqarnissaa periarfissaqarnerusimassagaluarpoq. Tamanna orniginarneruvoq tusagassiutit aqqutigalugit allaffigeqattaannermiit, Pisiffik A/S-mi sulisoqarnermut attaveqarnermullu pisortaq Søren Olsen Damgaard oqarpoq.
Taassuma paasisinnaannginnerarpaa inuusuttuaqqat ilinniartinneqartannginnerarlugit atuisut siunnersuisoqatigiivisa uparuartuinerat. Tassamigooq Pisiffik A/S-mi aalajangersimalluinnartumik suleriaaseqartoqarpoq sulisumik nutaamik aallartittoqaraangat.
- Ilungersuutigiuaannarparput pisinianut sullissinerup pitsaasuunissaa, tamannalu inuit isummertarnerisa sunnerniarnerigisut aammalu suliamut tunngasumik pikkorissaanerit aqqutigalugit. Inuusuttuaqqanik sulisortaaraangatta pitsaasumik sunnerniartarpagut. Soorlu suliffeqarnermut isummertarneq, piffissaq eqqorlugu suliartortarneq, ulluinnaat, suleqateqarneq aammalu nioqqutissat tuniniarnerannut tunngasunik ilitsersornissaat aammalu sullissanut kiinnertarneq pillugut, Søren Olsen Damgaard oqarpoq, taamaattoq ilumoortortaqarnerarpaa inuusuttuaqqat sulilersut ilaat naammaginartumik suliffimmut tunniusimaneq ajornerat
Taamaattoq Pisiffimmi nalunaaquttap akunnerpassuini ammasarneq pissutigalugu kingusissukkut sulisinnaasunik pissaqarnissaq pisariaqartuunerarpaa. Tassani pineqarput pisiniarfiit anginerit mikinerillu aammalu inuusuttuaqqat sulisuusarnerat ataavartussaanera taakkartorpaa.
- Pisiffik A/S-mut pingaaruteqarluinnarpoq inuusuttuaqqanik sulisoqarnissamut periarfissaqarnissaq. Tassani ilaatigut pissutaavoq suliffiup naliginnaasup avataani sulisinnaanerat piffissami tassani inersimasunik ilaqutalinnik sulisoqarniarneq ajornakusoortarmat. Aaamma oqartariaqarpunga inuusuttuaqqat sulisorisatta amerlanersaat suliaminnik naammassinnittartuusut, Søren Olsen Damgaard KNR.gl-mut oqarpoq.
