Pisassiissutinit pigiligassat qaammatip tulliani atuutilissapput
Aalisarnermut, Piniarnermut Nunalerinermullu Naalakkersuisoqarfiup maannakkut naatsorsuleruttorpaa qaleralittassiissutinit aalisariutinut anginerusunut umiatsiaaqqanullu qanoq amerlatigisut pisassiissutigineqassanersut.
Aalisartut ikittuinnaanngitsut qaleralinniarsinnaanermut akuersissuteqarput, katillugit 1.229-it akuersissuteqarlutik. Qeqertarsuup Tunuani 391-it, Uummannami 283-it Upernavimmilu 336-it.
Namminersorlutik Oqartussat sinerissap qanittuani qaleralinniarneq pilllugu nalunarutaat nutaaq, sapaatip akunnerani kingullermi atuutilersoq naapertorlugu aqutsiveqarfinni Upernavimmi, Uummannami Qeqertarsuullu Tunuani aalisartut aalisariutinik 6 meterinik aninginerusunik pigisaqartut qaleralinniarsinnaanermullu akuersissutaatillit akuersissummik nutaamik qaleralinniarsinnaanermut pisassiissutinit pigisat ilanngullugit tunineqassapput.
Aqutsiveqarfinni qaleralittassiissutit ima amerlatigipput, Qeqertarsuup Tunuani 8.000 tonsit, 6.000 tonsit Upernavimmilu 6.500 tonsit.
- Aalisarnermut Piniarnermut Nunalerinermullu Naalakkersuisoqarfiup ulluni makkunani naatsorsuleruttorpaa pisassiissutaasunit aalisariutit 6 meterinik anginerusut umiatsiaqqallu qanoq amerlatigisunik pisaqarnissaat naatsorsorlugit, Emanuel Rosing, Naalakkersuisoqarfiup immikkoortortaami pisortaq oqarpoq.
Peqqussummi allassimasoq naapertorlugu Naalakkersuisut aallaqqaammut pisassiissutinit marsip aallaqqaataanit tamatumaluunniit kingorna piaanerpaamik pigisaqalertitsissallutik aalajangersaassapput pigivigiligassaannik juulip aallaqqaatani tamatamaluunniit kingorna piaarnerpaamik aalajangersaassallutik.
Peter Olsen, KNAPK´p Ilulissani immikkoortortaani siulittaasoq KNR´mut ataasinngormat oqarpoq sinerissap qanittuani qaleralinniarneq pillugu nalunaarut atuutsinneqalereeraluartoq, taamaattoq aalisartunut erloqinartorujussuusoq ilisimatinneqarani ukioq manna qaleralittassat qanoq amerlatigissagaluarnersut.