Pisassat nungulerpaat

Kvartalit sisamaata aallartinneranit ullut 14-it qaangiutiinnartut kvartalit sisamaannut qaleralittassat Uummannap sulluani nungunneqalerput. Naalakkersuisut siusinnerusukkut nalunaareerput immikkut pisasseeqqittoqassanngitsoq. Taamaammat aalisartut naatsorsuutigisinnaavaat ukiup sinnera Uummannap sulluani qaleralinniartoqassanngitsoq.

- Uummannami pisassiissutit sinneruttut nungupallanneqarneranut pissutaasut ilagaat aqutsisoqarfimmi tassani aalisarnerup 26. septembarimi ammaqqinneqanerrata kingorna annertuumik aalisarsimaneq.

- Pissutaasut aappat tassaavoq qalerallit Uummannami ukioq manna siusinnerusukkut pisarineqarsimasut 350 tonsit ilanngaatigineqarnerat,  Kalaallit Nunaanni Aalisarsinnaannermut Akuersissutinik Nakkutilliisoqarfimmiit Niels Laursen nalunaarpoq.

Namminersorlutik Oqartussat erseqqissaatigaat 2011-mi Uummannap sulluani pisat ukiuni siuliini pisat amerlaqatigipajaaginnaraat.