PIP: Akissarsiat pillugit angusarput naammaginarpoq

Akissarsiat ukiuni tulliuttuni sisamani katillugit 11 procentinik qaffannissaat, PIP-p aamma Namminersorlutik Oqartussat isumaqatigiissutigaat, akissarsialli nalinginnaasumik 8,4 procentinik qaffassallutik.

Taakku saniatigut aqutsisunut perorsaasutullu ilinniarsimasunut soraarnerussutisianut akiliutini immikkullu ittumik akissarsiat qaffannissaat isumaqatigiissutigineqarpoq.

PIP-llu siulittaasuata Kaaliina Skiftep isumaqatigiissut naammagisimaarutigaa:

- Ukiunut sisamanut angusavut soorunami annerusinnaagaluarput, kisianni una massakkut angusarput suna tamaat katikkaanni 11 procentit angusarivavut, taamaammallu angusaq una ajunngitsutut nalilerpara, PIP-p siulittaasua Kaaliina Skifte oqarpoq.

Nunatta perorsaasunik ilinniarsimasunik pissarsiniarnermigut attassiniarnermigullu ajornartorsiuteqarnera pissutaalluni meeqqat inuusuttullu inuuniarnermikkut ajornartorsiuteqartut, angerlarsimaffiullu avataani inissinneqarnissaminnik maannakkorpiaq pisariaqartitsisut Danmarkimut ilaatigut aallarunneqartariaqartarput.

Soorlu Radioaviisimi oqaluttuarinikuugipput persorsaasutut ilinniarsimasut qinikkallu isumaqarput perorsaasut akissarsiaasa iluarsiivigineqarnissaat pisariaqartoq ajornartorsiutit qaangerniarneqassappata, nutaamillu isumaqatigiissusiorneq sulisussanik pissarsiniarnermut attassiniarnermullu iluaqutaassasoq, Kaaliina Skifte isumaqarpoq.

- Isumaqatigiissutigineqartoq nuannaarutigivara, isumaqatigiissummi qulakkeeratsigu ilaasortatta akissarsiaasa pitsanngoriarnissaat. Akissarsiat qaffariarneri pissutaallutik perorsaasut ilinniarsimasut sulinerminni suliffimminiiginnarnissaat aamma angusinnaassavarput, Kaaliina Skifte oqarpoq.

Meeqqat inuusuttullu pillugit sullissinerup nukittorsarneqarnissaa pillugu isumaqatigiissusiortoqartoq, Namminersorlutik Oqartussat isumaqatigiinniarnermi pisortaata Rasmus Sembach Olsenip oqaatigaa.

- Paaqqinnittarfiit aalajangersimasut pineqanngillat, paaqqinnittarfiilli ataatsimut isigalugit aaqqiivigineqarnissaat matumani anguniagaavoq, tassa perorsaasunik ilinniartitsissaagut, aqutsisullu pikkorissut pissarsiarissallutigit. Tassa isumaqatigiissutip massuma anguniagaa, Namminersorlutik Oqartussat isumaqatigiinniarnermi pisortaat Rasmus Sembach Olsen oqarpoq.