Pinngortitaq ingerlariaqqititsisoralugu
Suliniummi taaguutilimmi Timi Asimi, inuttut ineriartornissaq, ullut tamaasa timersorluni sungiusartarneq, tunniutiinnannginnissaq aamma inuusuttutut unammilligassanik sammisaqarnikkut inuttut piginnaasaqalernissaq anguniagaapput.
Suliniummi inuusuttut asimi periarfissanik asimiinnermillu ilisimasaqalernissaat siunertaavoq.
Asimi aalajangersimasumik siunnerfeqarluni suliaqarneq inuusuttut atugarissaarnerannut pitsanngoriartitsisinnaasoq ilisimatusarnikkut paasineqareerpoq, tassami inuusuttut inooqataanikkut piginnaaneqarnerulertaramik atuarnerminnillu nuannarinninnerulertarlutik.
Tamatuma peqatigisaanik inuusuttut uippakajaannginnerulerlutillu qinngasaarinnginnerusarput.
Suliniummi inuusuttuaqqat 15-it 18-illu akornanni ukiullit meeqqat atuarfiannik naammassinnissimanngitsut imaluunniit atuarnerminnik taamaatitsiinnarsimasut imaluunniit karakteeriminnik pitsanngoriartitserusuttut sullinneqarput.
Suliniummi atuartut inuttut piginnaasaat nukittorsarneqartarput, taamaalillutik ilinniagaqarsinnaaniassammata.
Inuusuttuaqqat taakkua 17-it ilaatigut nalunaaquttap akunnerini 24-ni ikiueqqaarnermut pikkorissarput, annaassiniarnermut pikkorissarlutik, 130 km-inik isorartussusilimmut pisullutik allanillu timikkut piginnaasaqarnerulersitsisussanik sammisaqarlutik.
Inuusuttuaqqat suliniummik naammassinnittut ullumi ulloqeqqata missaani uppernarsaatinik tunineqassapput.
