Pinngortitaleriffik Ilisimatusarfillu suleqatigiinnerunialerput
Ilinniarfeqarfiit periarfissarititaasa, pisinnaasaasa ilisimasaasalu kattullugit iluaqutigineqarnerulernissaat, aamma ilinniartitaanikkut, ilisimatusarnikkut qaammarsaanikkullu immikkoortumik kateriffeqalernissaq, ilinniarfeqarfissarsuarmik pilersitsiniarnermi anguniarneqarpoq.
Aningaasaliisartut nunatta avataaniittut maaniittullumi suliffeqarfiit peqatigiillutik kiminniarsarinialersaarpaat, Nunatsinni ilinniarfeqarfiit ilisimatusarfeqarfiillu peqatigalugit aningaasaliissuteqarluni ineriartortitsisinnaaneq periarfissagissaarmat, ataatsimoorlutik tusagassiuutinut nalunaarutaanni erserpoq.
Nunarput Issittumi nunanut allanut sanilliullugu immikkooruteqarpoq, namminerisamik ilisimatusarfeqarluni qaffasinnerusunillu ilinniarfeqarluni, nunaqavillutik ilisimatusartoqarlutik ilinniartitsisoqarlutillu.
Pinngortitaleriffimmi pisortap, Klaus Nygaardip, oqarnera naapertorlugu, ilisimatusartariaqarnerit ukiuni makkunani pisariaqaleraluttuinnarput.
- Ilisimatusariaatsit assigiinngitsut suleqatigiissittariaqarnerannik, minnerunngitsumillu inunnut tunngasortaasa ilanngunneqarnissaannik pisariaqartitsineq, annertusiartorpoq. Tassaniluuna Silap Pissusianik Ilisimatusarfeqarfik Nuummiittoq, qallunaanit kalaallinillu ingerlanneqartoq, taama ilisimatusartoqartariaqarneranik assersuutissaalluartoq. Taama periuseqarluni ilisimatusarnerit suli siammasinnerulersinniarpavut, Klaus Nygaard erserqqissaavoq.
