Aalisartoq: Pinngitsaalissummik ileqqaartitsisalerneq isumaqatigaa
Niels Geisler Nuup kangerluani qaleralinniartarpoq, pissamaatinillu nammineq katersagaateqalaarpoq.
Utoqqalinissaminulli ileqqaarnissani eqqarsaatigingaarsimanngilaa, naak ukiut qulit missaat qaangiuppata suliunnaartussaalluni. Pinngitsaalissummillu ileqqaartitsisalerneq isumaqatigaa.
- Taanna uanga isumaqatigisinnaavara aappaatigut, pissutigalugu qanoq ilisumi uneriataassagaluarutta katersaqalaarnissarput pissutigalugu. Ajorinngilara taanna, umiatsiaararsortoq Niels Geisler oqarpoq.
AAMMA ATUARUK Pinngitsoorani soraarnerussutisiaqalernissamut siunnersuut KNAPK-mit ilalerneqarpoq
Inatsimmi piumasaqaataavoq 100.000 koruuniniit ukiumi aningaasarsiorfiusumi isertitarisatit 0 procentimiit 150.000 koruunit, sinnerlugilluunniit, ukiumi aningaasarsiffiusumi isertitavit 4 procentiisa ileqqaartalernissaat.
Piareersimasoq
Ileqqaartalernissaq Niels Geislerip isumaqatigigaluarlugu annerusumik paasisaqarsimanngilaq. Aatsaallu nassuiaakkatsinni iluamik paasisaqarluni.
- Tassa aatsaat iluamik paasilluarpara, taava banki saaffigissavara. Piareersimasutut misigivunga. inatsisinngoreeruni tassa allatut ajornassagami.
AAMMA ATUARUK Pinngitsoorani soraarnerussutissiaqalernissaq tapersersorluarneqarpoq
Paasissutissiilluarsimanngitsut
Inatsit novemberimi 2016-imi Inatsisartunit akuerineqartoq januaarimilu atuutilersinneqartoq pillugu paasissutissiilluarsimannginneq innuttaasunut paatsuungatitsisoq, GrønlandsBankenimi sullissisunut pisortap aamma oqaatigaa.
- Inatsit nutaaq pillugu Inatsisartut tungaanniit iluamik paasissutissiisoqarsimanngilaq. Uagulli KNR-ikkut, Facebookikkut, raatiukkut, inuit maanga takkukkaangata allatigullu paasissutissiiniarsimavugut. Tamanna iluaqutaavoq, Grønlandsbankenimi sullissisunut pisortaq Peter Petersen oqarpoq.