Pinngitsaalisaallutik nuutsitaasunut filmi Akilinermi takuteqqaarneqarpoq
Filmi nutaaq taaguuteqartoq Martha of the North, Canadap katersugaasivissuani sapaatip akunnerani matumani pisortatigoortumik takuteqqaarneqarpoq. Filmiliarineqartut tassaallutik Nunavimmiut Inussuarmeersut 1953-imi pinngitsaalisaallutik nuutsitaasut.
Filmimi malittarineqarpoq Martha Flaherty, ukiut 50-ingajaat qaangiunneranni, Nunavummi nunaqarfiit avannarlersaannut Aasuitsumut uteqqittoq. Taanna tallimanik ukioqartoq ilaquttani ilaqutariillu allat arfineq-marluk peqatigalugit maanna nunaqarfimmut Aasuitsumik taaneqartartumut pinngitsaalillugit nuutsinneqarput. Taaamanikkut nuuffigisaat tassaavoq sissaq soqanngitsoq nilleqisorlu.
Naggueqatigiit Inussuarmiut politiinit atorfilinnillu oqaluttuunneqarput, avannarpasinnerusumi piniagassarissaarnerujussuummat nuuttariaqartut aamma nuuffigisartik nuannarinngikkunikku nunaqarfimminnut Inussuarmut uterteqqinneqassasut. Ajoraluartumilli tamakkua arlaannaalluunniit ilumoortortaqanngillat, naggueqatigiit Inuit ilarpassui nappaammit, kaannermit issersuarmillu toqorarput, tamakkuninngalu aniguisut aatsaat ukiut 35-t qaangiummata ilaquttatik Inussuarmiittut takoqqissinnaalerpaat. Maanna ilisimaneqalerpoq, Canadap naalagaaffiata Issittumi ilaqarnerata naqissuserniaannarlugu, naggueqatigiit Inuit avannarpasinnerusumut nuutsinneqarsimasut.
Tamanna Canadap oqaluttuarisaanerani ilisimaneqarpianngilaq; naggueqatigiit Inuit pineqartut suli uumasut taarsiiffigineqareerput, taamaattorli Canadap naalakkersuisuinit utoqqatserfigineqaratik.
Filmi ullumikkut pisunut tunngassuteqaqaaq, tassami Canadap Issittortaani Canadap naalagaaffiata oqartussaanera sammineqalermat. Filmi Inuktitut, Franskisut Tuluttullu oqaasertaqartoq, ilaatigut Nunavimmi kattuffimmit Makivimmit aamma Akilinermi naggueqatigiit Inuit kattuffiannit Inuit Tapiriit Kanatami-mit aningaasaliiffigineqarpoq. Filmi Martha of the North ICC aasaru Nuummi ataatsimeersualerpat takutinneqassaaq.
