Pinngitsaaliisimasorisaq iperarpaat

Angut 32-nik ukiulik Nuummi imerniartarfiit ilaata Maximutip silataani niviarsiaqqamik 14-inik ukiulimmik, arfininngornerup sapaatillu akornanni pinngitsaaliisimasutut nalunaarutigeqartoq politiit iperarpaat. Niviarsiaqqap angutillu 32-nik ukiullip oqaloqatigeqqinnerisa kingorna niviarsiaraq ilumut pinngitsaalineqarsimanersoq politiit erseqqissumik uppernarsisinnaasimanngilaat.
Allattoq Najaaraq Egede
juunip 28-at 2011 09:48

Pinngortaaliisoqarsimanersoq politiinit erseqqissumik uppernarsarneqarsinnaanngimmat angut tigummigallagaatissinnaannginnamikku iperagaatippaat.

- Ulluni 30-ni tullerni angut ilumut pinngitsaaliisimanersoq nalilersorneqassaaq  - meeqqamik 15-it inorlugit ukiulimmik atoqateqarsimanersoq - eqqartuussisunit nalilerneqassanersoq, tamanna Nuummi politiineersup Niels Nyvangip ilisimatitsissutigaa.

Niviarsiaraq 14-inik ukiulik, arnani ilagalugu arfininngormat unnuakkut pingasunut qiteqquttoq politiinut saaffiginnippoq, imerniartarfiup Maximutip silataani angummit pinngitsaalineqarnini nalunaarutigalugu. Angut kinaanersoq oqaatigisinnaasimavaa.

Angut 32-nik ukiulik sapaammi ullukkut tigusarineqarpoq, ukiukitsumillu pinngitsaaliisimasutut unnerluutigisassanngortinneqarluni. Angutip niviarsiaraq atoqatigisimanerarpaa, pinngitsaaliinerunngitsorli politiinut oqaatigalugu.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq