Pinngitsaaliisimasorisap tigummigallagaanera sivitsorpaat

Niviarsiaqqamik aqqaneq-marlunnik ukiulimmik pinngitsaaliisimasutut pasisap angutip 34-nik ukiullip tigummigallarneqarnera Qaanaap Eqqartuussivianit sapaatip-akunnerinik sisamanik sivitsorneqarpoq.
Allattoq Najaaraq Egede
novembarip 29-at 2010 14:06

Angut 34-nik ukiulik Qaanaami ukiukitsumut pinngitsaaliisimasutut pasillugu sapaatip-akunnerini sisamani oktobari naalersoq tigummigallagassanngortinneqarpoq. Tallimanngormallu novembarip 26-ani tigummigallagaanera sapaatip-akunnerinik sisamanik sivitsorneqarpoq.

Niviarsiaqqamik aqqaneq-marlunnik ukiulimmik pinngitsaaliisimaneq pillugu politiinut tallimanngornermi oktobarip 29-ani kalerriisoqarpoq. Politiillu kinguninngua angut 34-nik ukiulik tigusaraat.

Pinngitsaaliineq pisimassangatinneqarpoq illumi angutip 34-nik ukiullip inisimaffigisaani.

Politiit 34-nik ukiullip tigummigallarneqarneranik sivitsuinerat paasissutissat DNA-t suliamut pingaaruteqartut suli amigaatigineqarnerannik tunngaveqarpoq. Tigusimaleriarunikkit angut qanoq pineqarumaarnersoq paasinarsissaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq