Pinnerneqqusaannermi qallunaaq Nunarput sinnerlugu peqataassaaq
Arnanik kusarnarnersiorluni ujaasisartoq Peter Hadward, kalaallimik ujaaseqqullugu aaqqissuisunit qinnuigineqarpoq. Kisianni piffissaq ujaasiffissaq sivikippallaaqimmat qallunaamik toqqaasimalluni, Peter Hadward nassuiaavoq.
- Kalaallit Nunaannut pinnerneqqusaatitsiartorsinnaannginnatta qallunaamik toqqaaginnarpugut nalunnginnatsigu Kalaallit Nunaat Danmarkip ilagigaa.
Peter Hadward oqarpoq.
Iluatigut atisanik takutitsisartoq Lisa Renee Winther Kristensen Miss Civilization of the Worldimi, nunanit 30-init peqataaffigineqartumi, taamaasilluni peqataasussanngoriasaarpoq.
Kalaallisuummik kiuulimik qaqortumik sapangaarartalimmik "aasarsiummik" taasaminik ujaasinerarpoq, suli iluatsinngitsumik.
- Kalaallisuussaqanngikkaluarlunga kalaallit Nunaat pisinnaasara tamaat nittarsaatissavara, Lisa Renee Winther Kristensen neriorsuivoq.
- Kalaallit Nunaat sinnerlugu sassarnissara tanngassimaarutigeqaara, ataqqinaatitullu tiguara. Nuna nittarsaassassara kusanartorsuuvoq takusassarpassuaqarluni, taamaammat sapinngisara tamaat nittarsaatissavara takornariarfissatut pilerinarsarlugu, Lisa Renee Winther Kristensen Kalaallit Nunaanniinnikuunngitsoq oqarpoq.
Pinnerneqqusaanneq junip aappaaniit 13-anut Tyrkiami ingerlanneqalerpat pinnattaassat pilerinavissut arlaqarput.
- Ajugaasoq aningaasanik akissarsissaaq, assigiinngitsorpassuarnik tunissutisiassaqassaaq, Tyrkiami ulluni 14-ni feeriarneq eqqugassat ilagaat immaqalu aamma modelitut atorfininnissamut isumaqatigiissuteqarneq, tassami modelbureauerpassuit assilisittartussaminnik ujaasillutik isiginnaartussaapput Peter Hadward oqarpoq.
Aappaagu Miss Civilization of the Worldimut peqataasussamik kalaallimik Nunatsinni pinnerneqqusaatsitsinissaq pilersaarutigineqarpoq.