Piniartut Afrikaliarput
Silap allanngoriartornerata piniartuunermut Nunavummi kingunerisai, Jordan Konerup aamma illooraata Curtis Konerup oqaluttuarissavaat namminneq misigisatik najoqqutaralugit.
- Nunaqarfitsinni Arviami ukiakkut apisarnera kingusilligaluttuinnarpoq aammalu upernaakkut aputip aattarnera siusilligaluttuinnarluni, inuusuttut taakku marluk oqaluttuarput.
Taakku ilaatigut aamma oqaluttuaraat piniartoqatimi ilaat sikukkut nakkartarsimasut aammalu nannut neriniarlutik illoqarfinnut qanillattoraluttuinnartut.
- Silap allanngornerata kinguneri uagut Inuit uungaaralaakasit misigaavut, tamannalu nunarsuarmioqatitta ilisimasariaqarpaat. Issiaannarluta isiginnaaginnaraluarutta kulturerput imaaliallaannaq tammartussaavoq, Jordan Konek aviisimut Globe & Mailimut oqaluttuarpoq.
COP-17-ip ataatsimeersuarnerani, avatangiisinik illersuiniaqatigiinnit Canada saassutarineqagaatsiarpoq, tamatumunnga pissutaavoq Canadap premierministeria, Stephen Harper ippassaani oqarmat, CO-2 pillugu nutaamik inatsimmut pituttorsimasussamut isumaqatigiissutaasussaagunartumullu Canadap peqataaniarunnaarnini isumaliutigileraa.
Kyotomi isumaqatigiissutip taartissaa politikkikkut oqallisigineqalerpat, Nunatsinnit aallartitat marluk, Jens B. Frederiksen aamma Anthon Frederiksen, tamarmik Naalakkersuisunut ilaasortat, ullumimiit peqataalersussaapput.