Piniartup sunngiffimmi sammisassat ujartorpai
Inuusuttut 50-it 15-iniit 29-nut ukiullit inuttut ineriartornermik pikkorissartinneqassapput, pitsaanerusumik inuuneqarnissaq siunertaralugu.
Martin Petersen Kullorsuarmeersoq 25-nik ukiulik isumalluarpoq.
- Assut pitsaagaluarpoq inuttut piginnaaneq siuarsarlugu pilersitsisinnaappata, Martin Petersen piniartuusoq Kullorsuarmeersoq isumalluaqaluni KNRimut oqarpoq.
Inuusuttunut 25-nik ukioqalereersimasunut Kullorsuarmi sunngiffimmi imatorsuaq susassaqanngitsoq aamma oqaatigaa assullu suliffissaaleqisoqarnerarlugu ullullu makkua piniarnissamut periarfissat pitsaannginnerarlugit.
Qujanartumilli nunaqarfimmi timersortarfeeraqarpoq, taannalu 25-leerersimasunit assut atorluarneqartarnerarpaa.
Qaasuitsup kommunia Namminersortullu suleqatigiillutik suleqatigiillutik siorna oktoberimi pilersippaat meeqqanut minnernut atuarnerup avataani paarineqartarneq, inuusuttunut 14-iniit 21-nut ukiulinnut klubbeqartitsineq, atualersimanngitsunut pingasuniit arfinilinnik ukiulinnut atuarfimmi ulluunerani sammisaqartitsisarneq.
Kullorsuaq 430-t missaannik inoqarpoq taakkunanit inuusuttut 100-t missaanniillutik.