Piniartup pania ministeriunertut

"Kalaallit Nunaat tuaviuutipajutamik aatsitassarsiulernissamut naaggaarpoq", Reuterimi tusagassiortup, Alistair Scrutton-ip, allagaa Malaysiami internetikkut aviisip, The Star Online-p, saqqaani taama qulequtserneqarsimavoq.

Scrutton-ip ilanngullugu allaatigisimavaa piniartup pania Nunatsinni issiaviit pingaarnersaannut ingilluinnalerunartoq.

"Qaarusulerinermut illersuisoq Kalaallit Nunaanni qinersinermi ajugaavoq" USA-mi ABC-p tusagassiaani qulequtsiunneqarsimavoq.

"Kalaallit Nunaat siullermeerutaasumik arnamik siuttoqalerunarluinnarpoq, partii qiterliusoq qeqertarujussuup pinngortitarsuata pisuussutaanik nungusaanissamut ornigisaqartoq qinersinermi ajugaammat." CBC North allappoq.

Norgemiut ulapipallassimapput, taamaattorli tassa eqquinngitsumik, NRK-imi ippassarli ima allammat:

"Kalaallit Nunaat siullermeerluni arnamik ministeriunertaarpoq".

Norgellu naalagaaffiani tusagassiorfissuup ilanngullugu oqaatigisimavaa, qinersisartut aatsaat taama amerlatigisut qinersiartorsimasut taaniarlugu arnaq Nunarsuarmi qeqertat annersaannik tamakkiisumik naalagaaffinngortitsisinnaasoq.

Kineserit naalagaaffiata nutaarsiassaqartitsiviata, Xinhua-p, aamma qissimigaarsimavaa Nunatsinni qanoq pisoqarnera. Inerniliipput ajugaasup Aleqa Hammond-ip aatsitassarsioqatigiiffiit ammarnerannilli akileraarusersorneqassasut orniginartinnerugaa, uumali tunuartariaqalersup Kuupik V. Kleist-ip soqutiginerusimagaluaraa nunat allamiut aningaasaliisillugit aallartitseqatiginissaat, aammalu isumaqartoq aatsitassarsioqatigiiffiit aatsaat akileraaruteqartalissasut suliffeqarfiutitik sinneqartooruteqartalerpata.

Tamannalu ima paasisariaqarpoq, Royalties atorusunneqarnersoq, imaluunniit orniginartinneqannginnersoq.