Piniartoq: Qilalugarniarnermi periaatsit allanngortinneqartariaqarput
Ullumikkut qilalugarniartoqartillugu qilalugaq unngullugu seqquluunneqartarpoq, taamaattoqartillugulu aqerloq tammissinnaasarpoq inummillu eqqortittoqarluni, malittarisassaliortoqanngippat taamak pisoqaqqeriaannaavoq.
- Massakkut atuutiinnaleqqagunarami qilalugaq nuippat ungataaniikkaluarpalluunniit umiatsiaq taava seqqorlugu, tammiffigisoortoqarsinnaagami ilaa, arlaannilluunniit ikilerneqarsinnaalluni imaluunniit toqunneqarluni. Angajora uanga umiatsiamiillutik marluullutik inuit akornatigut aqerloq tamminnikuusimavoq, kisiat qujanartumik inuttai eqqorneqaratik, Job Nielsen oqarpoq.
2002-mi saqqami qilalukkerisoqartillugu piniartut ilaat aqerlumik tammiffigitippoq, tallinilu annaangajalluinnarlugu. Qilalukkallu nalaanni ajutoortarnerit aatsaat pilinngimmata Job Nielsenip ujartorpaa qilalugarniarneq pillugu inatsisiliortoqartariaqartoq, mianersuaalliortut inatsisitigut malersorneqarsinnaanngorlugit.
- Umiatsiat tungaannut seqqortut oqaatigigaanni akilissinneqartalertuugunik imaluunniit arlaannik advarsel-erneqarlutik ilaa ulorianartaramik, Uummannami piniartoq Job Nielsen oqarpoq.
KNAPK-mit ajornartorsiut tamanna ilisimaneqarpoq, siulittaasorlu Leif Fontaine oqaaseqartinniaraluaratsigu ataatsimiimmat oqaaseqartissinnaasimanngilarput.