Qaanaami piniartut imminut tatiginerulernissamut pikkorissartut
Oqalulluni, qitilluni erinarsorlunilu imminut naleqartinnerulertoqarsinnaava?
Taamaaliorneq piniartup Qaanaamersup iluaqutigivaa. Taanna Qaanaami piniartut allat 19-t peqatigalugit ulluni qulini pikkorissartinneqarput.
Piniartut imminut naleqartinnerulernissaat pikkorissaanermi anguniagaavoq. Imminullu tatiginerulerniarlutik nunaqqatiminnut naggataarnersiornermi erinarsorput.
- Pikkorissaqataanera peqqissimissutiginngilara, inuttut ingerlaninni periutsikkut nammineerlunga kinguartittakkaka nammineq iliuuserisartakkattuut kinguartittakkakka taavalu taqissutigisartakkakka suusinnaaneri paasigakkit, piniartoq pikkorissaqataasoq, Mads Ole Kristiansen oqarpoq.
Avannaata Kommunia, Namminersorlutik Oqartussat KNAPK-ilu peqatigiillutik ulluni qulinik pisumut aaqqissuussipput.
Piniartut arlallit pikkorissaanermi peqataasut nikagineqartutut misigisarput, tamannalu pikkorissarnermi sammineqartunut ilaavoq.
- Nunatsinni aalisartutut piniartutullu inuussutissarsiutillit avataaninngaanniit isigineqartarnerat, soorlu assersuutigalugu ilinniarsimanngitsutut tikkuartorneqartarnerat inunnut taakkununnga piniartuullutillu aalisartunut ullut tamaasa imminnut ilinniartittuartunut tulluartuunngilaq. Taamaammat aalisartut piniartullu sakkussaannit tuniorarluarneqarnissaat pisariaqarpoq, piniartoq oqarpoq.
Oqaasinnguinissartik ilinniarpaat
Piniartut pikkorissarnerminni nipitik, timertik, eqqarsaatitillu atorpaat. Taamaalillutillu misigissutsiminnik oqaasinnguiniarneq misilerarpaat.
Mads Ole Kristiansenillu pikkorissaasoqaqqissasoq neriuutigaa.
- Allat pikkorissarnikuunngittut pikkorissarneqarnissaat kissaatigissagaluarlugu.
Pikkorissaaneq Qaanaami innuttaasunut tusarnaartitsinermik naggaserneqarpoq.
Tassanilu inuit 100-t nuannisaqatigiissimasut pikkorissaasoq psykoterapeuti Henriette Berthelsen oqaluttuarpoq.
Nersortariaqartut
- Ilisimatuut paasisaat aallafigalugit qujaniarnerit nersuisarnerillu atorluaraanni, inuit imminnut naleqartutut misigisimanerannut imminullu tatiginerannut atorluaraanni sunniuteqartartoq, Henriette Berthelsen oqarpoq.
Imminullu naleqartinnerulernissamik pikkorissaaneq naggataajunngitsoq aamma oqaatigaa.
Henriette Berthlsen www.inua.dk-imi piginnittuuvoq, ilaatigut pikkorissaariaaseq "Inuit Power" atorlugu pikkorissaasarpoq.
- Erinarsorneq atortarpara. Erinarsorneq atorlugu misigissutsit sorpassuillu suliarisinnaagatsigit oqaasertalersuinngikkaluarluta, Henriette Berthelsen oqarpoq.