Pingitsaaliisimasutut unnerluunneqartut pinngitsuutitaapput
Unnerluunneqartut eqqartuussisuuserisui, Ulrik Blidorf aamma Aviâja Helmsip Aprilimi Nuummi eqqartuussisoqarneranit pineqaatissiinerup kingorna suliamik ingerlatitseqqinniarlutik maalaaruteqarput. Tamannalumi pissutissaqarluarpoq. Eqqartuussinerummi nangeqqinnerani pinngitsaaliisimasutut unnerluunneqartut pinngitsuutinneqarput.
Junip qaammataani kunngikkormiut nunatsinnut tikeraarneranni kunngikkut angallataat Dannebrog Nuummiippoq. Pinngitsaaliisoqarsimaneranillu unnerluut junip 17-ani 18-atalu akornani pisimasuutinnerarneqarpoq. Angutillu kunngikkut angallataanni umiartortuusut arnaq peqatigalugu isumaqatigiillutik atoqatigiissimapput. Kingornalu arnap pineqartup angutit taakku pinngitsaaliisutut unnerluutigai. Nuummi eqqartuussisoqarnerani siullermi arnap oqaaserisai angutit oqaaserisaannik eqqartuussisunit uppernarnerutinneqarsimagaluarput.
Eqqartuussinermilli ingerlatitseqqiinermi arnap pinngitsaalineqarsimasutut unnerluussisup nassuiaateqarnini allanngortissimavaa. Taamaalillunilu angutit unnerluunneqartut nassuinaaneri tutsuiginarnerulersillugit. Eqqartuusseqqinnermi nakuuserneq atorlugu, pinaaserluniluunniit atoqateqartoqarsimaneranik takussutissaqanngimmat unnerluunneqartut pinngitsuutitaapput.
Taamaalillutillu pinngitsaaliisimasutut unnerluunneqaraluartut pinngitsuutitaallutik maanna Danmarkimut angerlarsinnaanngorput.
Unnerluunneqartut eqqartuussisorisui maanna knr.gl-mit oqaaseqartinniarlugit pissarsiariniarneqarput.
