Pingasut isumaqataasut ataaserlu isumaqataanngitsoq: Imigassamik tuniniaajunnaarallarneq pissusissamisoorpoq
Naalakkersuisut coronamut akiuiniarnerminni killiliingaatsiarput.
Imigassamik tuniniaaneq nunatsinni kommunini pingasuni
unnuap qeqqanit inerteqqutaalerpoq, tamannalu kommunimi ataatsimi februaarip aallaqqaataanut atuutissaq, sinnerinilu qulingiluaata tungaanut atuutissalluni.
Naalakkersuisut imigassamik tuniniaajunnaarallarnissamik aalajangernertik atuutilernissaanut akunnerup missaannanngortoq nittartakkaminni nalunaarutigaat.
- Naalakkersuisut kommuninit arlalinnit piumaffigineqarput imigassanik aalakoornartortalinnik nioqquteqarneq imigassartortitsinermullu inerteqquteqarallarnissamik, Naalakkersuisut tusagassiuutinut nalunaarummi allapput.
KNR imigassat aalakoornartullit tuniniagaajunnaarallarnerat pillugu Nuummi inuttaasunik isumasiuivoq.
Inulerisup, 45-nik ukiullip, Sussie Lyberthip Naalakkersuisut aalajangiussaat isumaqatigai.
- Imigassap tunisaajunnaarallarnera pissusissamisoorsoraara, taanna oqarpoq, nangillunilu:
- Imatut paasillugu, nualluutip tuniluunnerata massakkut aqutassaanngitsumik inissisimanerani meerarpassuit inersimasullu eqqugaagamik. Taamaammat imigassap tunisaajunnaarallarnera pissusissamisoorsoraara.
Sussie Lyberthilu tapersiisuni kisimiinngilaq, utoqqalinermusiallip, 69-inik ukiullip Nicolai Geislerip imigassamik tuniniaajunnaarallarneq coronap tuniluunneranut annikillisitseqataasinnaasoraa.
- Coronap tuniluunneranut annikillisitsissappat tunisaajunnaarallarnera ajorinngilara.
- Inuit imigassartorlutik ataatsimoortarput, coronartoqarneralu puigortarlugu qanillivallaartoortarlutik. Taanna pissutigalugu ajorinngilara.
Akunnittarfimmili Hotel Aurorami ingerlatsisuusup, 43-nik ukiullip Josepha Lauth Thomsenip Naalakkersuisut aalajangiussaat paasisinnaanngilaa.
- Imigassamik tuniniaaneq ingerlaannarnikuuvoq, taamaattumik sooq maannakkut aatsaat tuniniaaqqusiunnaarnerat paasiuminaatsippara. Danmarkimi Savalimmiunilu ammariartorput.
Illit aalajangissagaluarukku imigassamik tuniniaaneq ingerlatiinnassagaluarpiuk?
- Suu, imigassamik tuniniaaneq ingerlatiinnassagaluarpara. Siusinnerusukkulli taama pisoqanngitsoq eqqumiippoq, tassami angalanermi PCR-testit piumasaqaataajunnaarsippaat. Imigassap pisuutinneqarnera eqqorsorinngilara.
60-inilli ukiullip Flemming Enequistip, siunnersortitut ulluinnarni sulisuusup imigassamik tuniniaajunaarneq ajoriffissaqartinngilaa.
- Imigassap tunisaajunnaarallarnera uannut ajornaquteqanngilaq. Coronammi tuniluunnerani inuit eqqissisimaarnissaat pingaarluinnarpoq. Illuanulli saassagutta, tassa tamatta tunillatsipallalluta napparsimaveqarfiup ulikkaarpallaannissaa ernumanarpoq. Taamatut killilersuineq ajorinngilara, Flemming Enequist oqarpoq.
Nunatsinni killilersuinerit - naatsumik
- Nunatsinni tamarmi tamanit iserfigineqarsinnaasuni coronapas atuutissaaq. Tassa neriniartarfinni, imerniartarfinni, filmertarfinni, katersortarfinnilu assigisaanilu.
Ukununnga isissaguit qanermut assiaquteqassaatit
- Tamanit iserfigineqarsinnaasuni (pisiniarfinni, oqaluffinni, atuakkanik atorniartarfinni assigisaanilu).
- Bussinut taxanullu ilaanermi.
-
Nunatsinni tamarmi neriniartarfiit imerniartarfiillu isersinnaasut, qatserisartut amerlassusaasinnaasutut akuerisaasa affaannaat isertissinnaassavaat.
-
Sumiiffiit imigassamik sassaallerfiusartut tamarmik februaarip aallaqqaataata tungaanut nalunaaqutaq 22 matusassapput.
- 15-ileereersimaguit akiuussuserneqarsimanallu taava atuakkanik atorniartarfinnut, filmertarfinnut, imerniartarfinnut, neriniartarfinnut allanullu tamanit iserfigineqarsinnaasunut iseqqusaanngilatit. Tamanna pisiniarfinnut aamma pisortat angallassisutaanut atuutinngilaq. Isernissannut tunillatsinnikuusimanerit uppernarsarsinnaassavat.
Danmarkimit angalasut
- Januaarip ulluisa 26-at aallarnerfigalugu Kastrupimi nassatanik tunniussinermi tunillatsissimannginnermut uppernarsaateqarnissaq pisariaqarunnaarpoq. Tassa misissortissimanermut piumasaqaat atuukkunnaarpoq.
Naalakkersuisut kommuninit arlalinnit piumaffigineqarput imigassanik aalakoornartortalinnik nioqquteqarneq imigassartortitsinermullu inerteqquteqarallarnissamik. Qinnuteqaatit akuerineqarput unnuap qeqqaniillu Kommune Kujallermi, Qeqqata Kommuniani aamma Kommuneqarfik Sermersuumi atuutilissapput. 9. februar 2022 ilanngullugu Kommune Kujallermi aamma Kommuneqarfik Sermersuumi inerteqquteqarneq atuutissaaq Qeqqata Kommunianilu 1. februar 2022 ilanngullugu inerteqqut atuutissaaq.
