Pingajussaanik pissartanngorpoq

Sukkanniunnermi peqataaasut ilaat Ilulissanut ippassaq angerlamut tikinnerat nunaqqataasunit alutorsaatigineqarpoq.

- Ippassaq taarsereertoq tikippugut, taava mittarfimminngaanniit qimminukarnitsinni aqqutaani ikumatitalerlutik tikilluaqqusisut takullugit assorujuk tikilluarnarput, Jørgen Kristensen oqarpoq.

Inuit aqqusinermi naapitatit qanoq qisuariartarpat?

-Tassa ingerlaannaq unitsittarpaannga, taavalu assammillunga pilluaqqusillutik. Nuan. Ajungaasimaarsimasorujussuupput malinnaalluarsimallutillu. Ilulissani Atersuit eqqaanni qimussit aqqutaata nalaani Jørgen Kristensen qimmiliveqarpoq. Avannaata Qimussersuanut peqataanissani sioqqullugu sungiusarluni sapaatip akunneranut pingasoriarluni-sisamariarluni qimussertarpoq. Sungiusartarnermini pikkorinneruffigisinnaasani eqqarsaatigisarpai, kukkussutinilu ilinniutigisarlugit:

- Allunaasanik sillimmateqarnissaq pingaartittarpara, soorlu maani qimmeersingajaavippunga. Savinnik kipisissutissanik iluamik inissiisarnissaq aamma pingaaruteqarpoq. Aallannginnermi qimussernissamik iluamik aaqqissuussinissaq eqqarsaatigisarpara. Imatut ulapiinnaq pinani. Isigisat maliinnarnagit naamineq pilersaarutit malikkaanni iluarneruvoq.

Qimminnut arlaannik aalajangersimasumik ileqqoqarpit?

- Qimmit ajunngitsumik pigaanni taava inuttaminnut ajunngitsumik pinnittarput. Ilaanni eqqarsartaraluarpunga ilungersunalaartoq, qimmilivimmik saliillunga, nerisitsillunga, imerfissaat suliaralugit ilungersunalaarsinnaasaraluarpoq. Eqqaamaannartarparali ajunngitsumik pigaanni ajunngitsumik kinguneqartarpoq, Jørgen Kristensen oqarpoq.

Jørgen Kristensenip neriuutigaa siunissami Avannaata Qimussersuaqalernissaanut atatillugu, meeqqanik inuusuttuaqqanillu qimussernermik ilinniartitsoqartalerumaartoq.