Pinerluuteqarsimasunut inissiisarfimmik isornartorsiuisut ilalerpai

Europarådets Torturkomite, inuit naalliutsinneqartarneri akiorniarlugit Europarådip nakkutiginnittui siorna Nunatsinniipput, pinerluuteqarsimasunullu Nuummi inissiisarfik ilaatigut takuniarlugu.

Inissiisarfimmi inissinneqarsimasut akornanni ikiaroornartunik imigassamillu ilaatigut atornerluisoqarnera isornartorsiorneqarpoq, katsorsaanissamillu periarfissat killeqarnerarneqarlutik, soorlu aamma inissinneqarsimasut immikkoortinneqartarnerat ajornartorsiutitut taakkartorneqartoq.

- Inissinneqarsimasut immikkut ittumik inissinneqarsimasutut ittut takussaapput. Ineeraaqqani inissinneqartarput, akunnerit 23-t tikillugit inissinneqarsimasinnaasarlutik, akunnerlu ataaseq anisinnaatitaasarlutik. Taassuma saniatigut sammisassaqartinneqarneq ajorput. Europarådimit ilaatigut tamanna isornartorsiorpaat.

Europarådip isornartorsiuinera pimoorullugu tiguneqartariaqarpoq, AnneMette Nyborg Lauritsen, Kalaallit Nunaat immikkut sammisaralugu ilisimatuutut misissuisimasoq oqarpoq.

- Taama isornartorsiuisoqarnera naalagaaffiup pimoorullugu tigussagaa neriuutigaara, taamaaliortoqanngippammi kanngunartuliornerussaaq, Anne Mette Nyborg Lauritsen oqarpoq.

Inissiisarfimmi inissinneqarsimasut inuiaqatigiinni inooqataaleqqinnissamut sungiusarneqartarnerat aamma killeqartoq, taassuma oqaatigaa.

- Inuiaqatigiinni inooqataalernissaannut sungiusaaneq pivallaarunnaarlugu, allaanngilaq nakkutiginninnerujussuarnissaq pingaartinneqarnerusoq. Tassami assiliissutit tamani tamaani takuneqarsinnaapput. Danmarkimi parnaarussivinni taamaaliortoqarnerluunniit ajorpoq, Anne Mette Nyborg Lauritsen oqarpoq.

Isornartorsiuiinnanngilarli nersualaarinnillunili. Arnammi immikkut inissinneqarsinnaanngorsimanerat, Anne Mette Nyborg Lauritsenip maluginiarsimavaa.