Pinerluttut atugarissaarnerusariaqarput
Isumasioqatigiinneq pissaaq Folketingip Kalaallit Nunaat pillugu ataatsimiititaliaat inatsiseqarnermullu ataatsimiititaliaq peqatigalugit. IA sinnerlugu folketingimut ilaasortaq Sara Olsvig ministerip isumasioqatigineqarnissaanut aggersaasuuvoq ilaatigullu oqaluuserineqassapput Nunatsinni pinerluuteqarsimasunut inissiisarfinni ammasuni sulisut atugaat aamma matoqqasumi inissiisarfiliassaq pinerluuteqarsimasunullu inissiisarfinni pissutsit allat.
Qaammatit kingullit tallimat ingerlaneranni Sara Olsvig arlaleriarluni pinerluuteqarsimasunut inissiisarfiit pillugit apeqquteqaateqartarpoq kingullertullu inatsisinik atortitsinermut ministeri piareersaataasunik arfineq pingasunik apeqquteqarfigaa isumasioqatigiinnerup siunnerfilimmik naammassinissaa anguniarlugu.
Sara Olsvigip ilaatigut inatsisinik atortitsinermut ministerimut apeqqutigaa uppernarsarsinnaanera inatsinik atortitsineq ataavartumik Danmarkimi pissutsinut nallersuuttunngorsarneqassanersut. Pinerluuteqarsimasunut inissiisarfiit eqqarsaatigalugit ilisimaneqarpoq Kalaallit Nunaanni Danmarkimilu pissutsit assigiinngitsut. Pingaartumik Sara Olsvigip piumasaraa inuiaqatigiinnut uteqqinnissamut aammalu suliffissaqarnissamut inissiisarfinni ammasuni pissutsit pitsaanerulernissaat.
Pissutsit iluarseriarnissaat qulakkeerneqassappat aningaasartai aamma malinnaasariaqarput. Taamaammat isumasioqatigiinnissami Sara Olsvigip inatsisinik atortitsinermut mininsterimut nassuiaqquaa pinerluuteqarsimasunut inissiisarfinni sulisut ilinniartitaanerisa pitsanngorsarnissaa qanoq akeqassanersoq.
Folketingip sulinera aallartimmalli Sara Olsvigip pinerluuteqarsimasunik isumaginnittoqarfimmi atugassarititaasut aamma pinerluuteqarsimasunut inissiisarfiit sammivai taamaammat aamma siunnersuutigaa Kalaallit Nunaat pillugu ataatsimiitialiaq tullianik Nunatsinnut angalalerpat pinerluuteqarsimasunut inissiisarfiit pingaarnertut sammineqassasut.
