Pinerluttunik isumaginnittoqarfik: Kisimiititsineq immikkoortitsilluni parnaarussinerunngilaq
Illersuisummi peqatigiiffiat kiisalu inatsisileritooq Finn Meinel oqaluttuarneri malillugit taamatut kisimiitillugit parnaarussisarnerit pineqaatissinneqarsimasunut iluanngitsumik pinninnertut tarnimullu ajoqutaasinnaapput. Pinerluttunilli Isumaginnittoqarfiup pisortaa isumaqataanngilaq.
- Tassami qanoq sivisutigisumik kisimiillutik isertitsivimmiissanersutit apeqqutaavoq. Ullummi sisamaannaat taamatut pineqaatissinneqarsimagaanni, nalunagulu ullut sisamaannarni tassaniittussaalluni tarnimut ajoqutaanavianngilaq.
Thomas Nicolajsen taama oqarpoq, pineqaatissinneqarsimasullu maleruagassanik unioqqutitsisimagaangata sulisut taamatut pillaatissiissutigisinnaagaat pillugu kisimiitillugit parnaarussinertut assersuunneqarsinnaannginnersoq aperigatsinni ima akivoq:
- Naamerluinnaq. Taamatummi pillaatisissunneqarsimasoq ullut tallimat ullullu arfineq marlunnik akornanniinnaq kisimiissinnaatitaavoq. Nalunngikkaluarparami Finn Meinelip sullitaasa ilaat sivisunerusumik taamatut pillaatissinneqartartut, atugassarititaasullu Meinelip naammagittaalliutigisareerai.
Tamakkununngali tunngatillugit maleruagassaqarpugut. Tassami inuit taakku aneertarfimmiissinnaatitaapput, pineqaatissinneqarsimasut allat akornaniissinnaatitaallutik, nukkassartarfimmiissinnaatitaallutillu.
Aamma ilinniartinneqarsinnaatitaapput, sivisunerusumillu pulaarteqartarnissamut periarfissinneqartarlutik. Tassa Eqqartuussiviup immikkut ittumik aaliangiussaanik kisimiilluinnartussatut pineqaatissinneqarsimanngikkuit pisinnaatitaaffiit taariikkakka periarfissarissuatit.
Pineqaatissinneqarsimasulli pisinnaatitaaffii taagoriikkat atuutsinneqartannginneri Finn Meinelip oqaatiginnissimanera pisortamut nittarsaakkatsigu ima oqaaseqarpoq:
- Finn Meinelip naammagittaalliuutit assigiinngitsut uagutsinnut nassiussimagai nalunngilara, taakkuli ataasiakkaarlugit suliarissavagut isummerfigissallutigillu. Tassa imatut immitsinnut aperisariaqarpugut: Maleruagassat malinneqarpat? Taamaammat suliat ataasiakkaat Finn Meinelip saqqummiussai oqaaseqarfigisinnaanngikkallarpavut.
Inatsisileritooq Finn Meinel Pinerluttunik Isumaginnittoqarfimmut qaammatit arlallit matuma siorna naammagittaalliuteqarpoq, pineqaatissinneqarsimasullu qaammatini arlalinni kisimiitillugit parnaarussaaqqasarsimasut, piffissamilu tassani neqeroorutit pisinnaatitaaffiutinneqartut pisortap assersuutigisai atuutsinneqartarsimanngitsut naammagittaalliutigai.
Thomas Nicolajsenillumi kisimiitillugit inissinneqarsimasunut maleruagassat taakkorpiaat pillugit nalunaarusiortuuvoq. Ilumulli malinneqartarnersut aperigatsinni ima akivoq:
- Aap. Sulisuvummi maleruagassat taakkorpiaat pillugit pikkorissartarpagut, taamaammallu maleruagassat malissagaat naatsorsuutigalutigu. Malinneqassanngikkaluarpatali taava soorunami tamanna ajorluinnassaaq. Tassami maleruagassat tamatta malittussaavagut. Nunatsinni Pinerluttunik Isumaginnittoqarfimmi pisortaq Thomas Nicolajsen taama oqarpoq.
Aamma pineqaatissinneqarsimasut amerlanerujartuinnartut kisimiitillugit inissinneqartarnerinik Illersuisut Peqatigiiffiata pisuutitsiniutai ilumuunnginnerarpai, akerlianilli ukioq manna, tassa 2012-imi ikileriarsimasut oqaatigalugu.
Taassuma oqaluttuarnera naapertorlugu Nuummi Pineqaatissinneqarsimasunut inissiisarfimmi pineqaatissinneqarsimasoq ataasiinnaq taamatut kisimiittussianngorlugu massakkorpiaq inissinneqarsimasoq oqaatigaa.
