Nakuusertoqarneranik nalunaarutiginninnerit aatsaat taama amerlatigisut
Nunatsinni pinerluuteqartartut ikilipput. Pinerluttulerinermut inatsimmik unioqqutitsinerit ukioq kingulleq nalunaarutigineqartut 2016-imut sanilliullugit 420-nik ikinnerupput. Nakuusertoqarneranilli nalunaarutiginninnerit aatsaat taama amerlatigisut, politiit 2017-imi ukiumut nalunaarusiaanni allassimavoq.
Pinerluttulerinermik inatsimmik unioqqutitsinerit siorna katillugit 4221-upput. Ukiup siuliani tassa 2016-imi taakku 4641-simasut politiit naatsorsueqqissaarnerata takutippaat.
Nalunaarutiginninnerit appariarnerat nunatsinni nalunaarutiginninnerit ikinnerpaaffigisaattut amerlatigingajapput, 4132.
Taamaakkaluartorli unnerluutiginninnerit suli amerlangaatsiartut, politimesterip, Bjørn Tegner Bayip ukiumut nalunaarummi erseqqissaatigaa.
Kiisalu politiit ilisimanngisaannik illoqarfinni pinerlunnernik annertuumik ineriartortoqarpoq.
Politiit isaaniit inunnut navianartorsiortitsinermik pinerlunneq tassa nakuuserneq, toqutsineq kinguaassiutitigullu pinerluuteqarneq ajornartorsiutit annerpaartaraat.
AAMMA ATUARUK Politiit hasheernianit 4 millionit koruunit arsaarinnissutigigaat
Nakuusernermik nalunaaruteqartut amerliartuinnarput - nakuusernermik nalunaaruteqartut siorna 854-iupput, tamannalu 9 procentimik amerleriarneruvoq, politiillu 1980-kkunniilli naatsorsuisalerneranni aatsaat taama amerlatigalutik. Innuttaasoqassuseq malillugu nunatsinni nakuusertoqarneranik nalunaarutiginninnerit Danmarkimit sisamariaammik amerlanerusut, ukiumut nalunaarummi allassimavoq.
Kinguaassiutitigut atornerluinerit meeqqanut naapertuutiliunngitsuliornerit nalunaarutigineqartartut amerlassusaat allanngunngilaq. Sulilu ”amiilaarnaannartumik amerlapput”, politimesteri allappoq.
Inunnut navianartorsiortitsinermik pinerlunnerit amerlanerujussuat eqqaassanngikkaanni tillinniarnerit ikilipput. Tamatuma saniatigut inuusuttut akornanni pinerlunnerit appariarput, 2016-imut sanilliullugu 24 procentimik appasinnerulluni.
Innuttaasulli nakuusernerit kinguaassiutitigullu atornerluinerit sooq taama qaffasitsigiinnarneri pisuttorniarlunilu pinerluttuliornerit apparnerat innuttaasut tupigusuutigisariaqaraat, Bjørn Tegner Bay ukiumut nalunaarusiap siulequtaani taama ilaatigut allaaserisaqarpoq.
