Pinerlussimasut taamaallaat 90-it utaqqisuupput
Utaqqisut taama ikilisimatiginerinut pissutaaqataaneruvoq, pinerlussisimasunut inissiisarfiugallartussap Kangerlussuarmiittup siorna septembarimi ammaqqinnerata kinguneranik.
Inissinneqarnissaminnut utaqqisut ukioq ikilineri, Pinerluttunik Isumaginnittoqarfiup pisortaataavata, Hans Jørgen Engbo-p nuannaarutigaa.
- Juulip aallaqqaataani atorfinitsitaanera utaqqisut ikilinerinut pissutaanngilaq. Tamassumunnga pissutaaneruvoq, folketingip ukiunut tulliuttunut arlalinnut atuuttussamik aningaasaliinerisa kingorna. Aningaasaliissutillu taakku atorlugit Kangerlussuarmi utaqqiisaagallartumik inissiisarfiup 2014-ip tungaanut ammaqqinneqarnissaa piviusunngorsinnaasimalluni.Tassanilu inissat 30-inik tassa ilaneqarput, Hans Jørgen Engbo oqarpoq.
Kalaallit Nunaanni Pinerluttunik Isumaginnittoqarfiup ukioq manna aaqqissuuteqqinneqarnerata kingorna, pinerlussimasut inissinneqarnissaannik utaqqisarneq atorunnaarsinneqartussatut siunniunneqarsimasoq, Hans Jørgen Engbo-p oqaatigaa.
- Pinerlussimasut inissinneqarnissaannik pineqaatissiinerit eqqartuussisunik aalajangiussat nerrivitsinniileraagata utaqqisitsisarneq atorunnaarsipparput. Taamaallaat utaqqisaaginnalersarpoq, qanoq sivisutigisumik pineqaatissinneqartup eqqartuussiveqarfinnit aalajangerneqarnissaa, Hans Jørgen Engbo oqarpoq.
Kisitsisit kingulliit takutippaat, maanna utaqqisut 90-it akornanni 30-it piffissaq ungasinngitsoq qaangiuppat inissinneqartussaasut, taakkulu Kangerlsussuarmiittussaallutik.
- Kangerlussuarmi inissiisarfik atorluarneqarpoq. Aamma inissiisarfinni allani arfinilinni inissaqartitsisoqalersimavoq, tamassumunnga pissutaaneruvoq tigumigallagassat ikilisimanerinut. Taamaalilluni inissinneqarnissaminnik utaqqisut erngerlutik inissinneqartalernissaat anguneqarsimalluni.
Pinerluttunik Isumaginnittoqarfiup pisortaataavata, Hans Jørgen Engbo taama oqarpoq, ilanngullugulu oqaatigalugu aaqqissuusseqqinnerup kinguneranik Pinerluttunik Isumaginnittoqarfimmi pisortap tullissaanik atorfinitsitsisimaneq.
Kalaallit Nunaanni Eqqartuussiveqarneq pillugu isumalioqatigiissitaq, Taqsiilami sisamanngorpat tallimanngorpallu ataatsimeeqatigiissapput, peqataassallutik qallunaat inatsiseqarnermut ministeriaqarfiani aamma Nunatsinni inatsisinut atuutsistsinermi Naalakkersuisoqarfimmi qaffasissumik atorfillit.
