Pineqaatissinneqarsimasunut inissiisarfimmiinnissamik utaqqisut 69-iusut
Pineqaatissinneqarsimasunut inissiisarfiit inissaalatsisarmata, taakkununnga inissinneqarnissamik utaqqisut ukiut tamaasa amerlasarput.
Pineqaatissinneqarsimasuni utaqqisut massakkorpiaq 69-iusut, Pinerluttunik Isumaginnittoqarfiup kisitsisaatai kingulliit 2023-mi maajip aappaaneersut takutippaat.
- Utaqqisoqarpallaannginnissaa sulissutigiuassavarput. Pineqaatissinneqarsimasut inissinneqarnissaannik qulakkeerisussaatitaagatta inissaqartileriaraangatsigit soorunami inissittarpagut, Pinerluttunik Isumaginnittoqarfiup pisortarigallagaa Christian Høygaard oqarpoq.
Qanorluunniilli oqallisigitigigaluaraanni pinerluuteqarsimasunik utaqqisoqartuaannassaaq.
- Qaquguluunniit utaqqisuerunnaarnavianngilaq, Christian Høygaard KNR-imut oqarpoq.
Pineqaatissinneqarsimasunili ukioq manna utaqqisut siorna utaqqisuninngarnit 86-isunit ikinnerulaarput.
Pineqaatissinneqarsimasut tamarmik ataatsikkut inissinneqarsinnaanngitsut
Inissaalatsinerli utaqqisoqartuaannartarneranut kisimi pissutaanngitsoq, Pinerluttunik Isumaginnittoqarfiup pisortarigallagaa oqarpoq.
Suliammi tamarmik immikkut naliliiffigineqartarnerat suliarineqartarnerallu utaqqisoqartarneranut aamma peqqutaaqataapput.
- Pineqaatissinneqarsimasut inissiisarfimmut sorlermut inissikkaanni naleqqunnerussanersoq naliliisarpugut. Pineqaatissinneqarsimasummi ilaquttamik ilaata suliffigisaanut inissinnissaat ingalassimaniartarparput. Taamaammat nalileeqqaartariaqartarnerput piffissartornartarpoq, Christian Høygaard oqarpoq.
Pineqaatissinneqarsimasullu tamarmik ataatsikkut inissinneqarsinnaasannginnerat utaqqisoqartuaannarneranut aamma pissutaaqataavoq.
Tamanna ilaatigut pineqaatissinneqarsimasut takkutinngitsoorsimanerannik, inissinneqarnissaannik kinguartitsisoqarsimaneranik allarluinnarmulluunniit tunngatillugu tigummigallagaanerannik pissuteqartarpoq.
Taamaammat pineqaatissinneqarsimasuni 44-ruunnaat aggersagaasartut, Pinerluttunik Isumaginnittoqarfik ilisimatitsivoq. Taakkualu affaasa missaat maajimi juunimilu inissinneqarnissamut aggersagaareertut, Christian Høygaard aamma ilimatitsivoq.
Ineqatigiisitsisarneq inissiinissamullu pilersaarusiorneq
Pinerluttunik Isumaginnittoqarfik Danmarkillu inatsiseqarnermut ministereqarfia pineqaatissineqarsimasunik utaqqisoqarpallaannginnissaanut assigiinngitsunik aaqqiissuteqarnissamik suleqatigiipput.
Pineqaatissinneqarsimasunut inissiisarfinni inissat amerlinissaat suliniutaalereersunut ilaavoq. Tassa nunatsinni pineqaatissinneqarsimasunut inissiisarfinni inissaareersuni allanik inissaqalersitsipput, tassalu pineqaatissinneqarsimasut ilaat marlukkuutaarlutik ineqatigiittarput.
Inissiinissamut aamma pilersaarusiulersaarlutik, Christian Høygaard oqarpoq.
- Ineqatigiissitsisarnerup saniatigut inissiinissamut qanoq pitsaanerusumik pilersaarusiorsinnaanersugut Danmarkip pinerluttunik isumaginnittoqarfiata pisortaqarfialu suleqatigiissutigaarput, pisortaagallartoq oqarpoq.
Pinerluuteqarsimasut inissiisarfimmiinnissamut utaqqinermi pinerluttuliunnginnissaannik Pinerluttunik Isumaginnittoqarfik qulakkeerisuusinnaanngilaq.
Pinerluuteqarsimasunulli inissiisarfimmiinnissamut utaqqisut pinerloqqissinnaasutut nalilikkat tigummigallarneqarnissaannik eqqartuussivik aalajangiisuusartoq, Christian Høygaard erseqqissaavoq.
- Tassa pineqaatissinneqarnissamut utaqqigaanni aggersagassanngorsimagaannilu, taava tigummigallarneqarnissamik piumasaqaatit naammassineqarsimassanngillat.