Pineqaatissinneqarsimasunut inissiisarfimmut utaqqisut amerliartuinnartut
Ajornartorsiutaallunilu aarlerinartoq.
Sammisamik suliaqartut politikerillu inuit 64-it pineqaatissinneqarsimasunut inissiisarfimmiittussaagaluartut nunatsinni angalaannarnerisa saqqummiunneqarneranni siorna taama oqarput. Taakkunannga 15-it meeqqanut kinguaassiutitigut naapertuillanngitsuliorsimapput.
Ajornartorsiullu tamatuma kingorna annikinnerulinngilaq, annertunerulerlunili. Inuit 70-it inissaqartinneqanngitsut maanna utaqqiinnarput.
Inissiisarfimmiilernissamut utaqqisut aaku:
* Tunumi, inuit qulingiluat
* Kujallermi, inuit pingasut
* Nuummi, inuit 26-t
* Qeqqani, inuit 23-t
* Avannaani, inuit qulingiluat
* Katillugit: Inuit 70-it
Paasissutissarsiffik: Kalaallit Nunaanni Pinerluttunik Isumaginnittoqarfik oktobarip ulluisa arfineq-pingajuannit
Tamanna Kalaallit Nunaanni Pinerluttunik Isumaginnittoqarfiup KNR-ip atorneqartussanik naatsorsuinerata takutippaa.
Nunatsinni pineqaatissinneqarsimasunut inissiisarfinni 154-it inissaqartinneqarput.
Taamaammat Pinerluttunik Isumaginnittoqarfiup kikkut siulliullutik isissanersut pingaarnersiortarpai.
Nunatsinni eqqartuussiveqarfiit toqqaannartumik inissiisoqarnissaanut imaluunniit inuiaqatigiinni akuulluni eqqartuussutip pinissaanut utaqqiinnartoqarsinnaanersoq sakkortussusilerlugu aalajangertarpaat.
Utaqqisunit 70-init 13-it pinngitsaaliillutik atornerluuteqarsimanngikkunik kinguaassiutitigut pinerluuteqarsimapput. Taakkunannga tallimat Nuummiipput, sisamat Avannaani, pingasut Kujallermi ataaserlu Tunumi.
Taakkunannga ataaseq meeqqamut 18-it inorlugit ukiulimmut pinerluuteqarsimavoq. Pinerluttunik Isumaginnittoqarfik taama paasissutissiivoq.
AAMMA ATUARUK Ministeri utaqqisuniittut pillugit: Kinguaassiutitigut pinerluuteqarsimasut utaqqiinnartarnerat ajornartorsiutaavoq
Inatsiseqarnermut oqartussaaffik nunatta akisussaaffiginngimmagu danskit inatsiseqarnermut ministeriat, Nick Hækkerup nunatsinni pinerluuteqarsimasunut inissiisarfinnut akisussaasuuvoq.
Taassuma pinerluuteqarsimasunut inissiisarfinni inissaqanik pissarsiniarneq sulissutigineqartoq KNR-imut siorna allakkatigut akissuteqaatigaa.
- Kinguaassiutitigut atornerluisimasutut Kalaallit Nunaanni inuiaqatigiinni akuuinnarlutik inissiisarfimmiilernissaminnik utaqqiinnarnerat ajornartorsiutaasoq isumaqatigilluinnarpara.
- Pineqaatissiisarnerup qaffasissusaa qaffanneqarsinnaanerulerniassammat inissiisarfinni amerlanerusunut inissamik nassaarsiornermik aallartitsivunga, Nick Hækkerup taamani allappoq.
Suliap tamatuma qanoq ingerlasimanera pillugu akissutersiniarneq iluatsinngilaq. Inatsiseqarnermummi ministeri suliamut tunngatillugu apersorneqarusunngilaq.
Naammaginanngitsoq
Naaja Nathanielsen ilaatigut inatsiseqarnermut naalakkersuisuusoq Nunatsinnilu Pinerluttunik Isumaginnittoqarfimmi pisortaasimasoq aperigaanni utaqqisut amerliartuinnarnerat ernumanartuunerarpaa.
Nunatsinni Pinerluttunik Isumaginnittoqarfiup inissaqartitsinera
Nunatsinni pinerluuteqarsimasunut inissiisarfinni inissat 154-iupput:
- Tasiilami inissat 15-iupput
- Ilulissani inissat 29-upput
- Aasianni inissat 15-iupput
- Sisimiuni inissat qulingiluaapput
- Qaqortumi inissat quliupput
- Nuummi pinerluuteqarsimasunut inissiisarfittaami inissat 76-iupput
- Tassani: 40-t matoqqasumi inissaqarput, 36-llu inissiisarfiup ammasortaani inissaqarlutik.
- Inissiisarfimmiilernissaminnut utaqqisunut tamanut minnerunngitsumillu pinerluuteqarfiusimasunut qanigisaasunullu tamanna nanertuutaavoq. Tamanna ukkatarineqarlunilu annikitsuinnarmik suliarineqannginnissaa qularutissaanngilaq. Suliamik isumaginnittarnermut piffissaq suliap aallartinneranit pineqaatissinneqartup inissiisarfimmiilernissaanut misissorneqarnissaa pisariaqarpoq. Tamanna sivikillisarneqassaaq. Tamanna qularutissaanngilaq, Naaja Nathanielsen oqarpoq.
Suliamik isumaginnittarneq imaluunniit pineqaatissinneqarsimasunut inissiisarfinni inissaqartitsineq ajornartorsiutaanersoq oqaatigissallugu siusippallaartoq naalakkersuisup oqaatigaa.
- Isumaqarpunga tamatigut ajornartorsiutaasoq. Ukiuni kingullerni suliamik ingerlatsisoqarpoq, tassani sumi ajortoortoqartarnera qulaajarniarneqarpoq. Maanna qanoq iliortoqarnissaa pillugu akissuteqartoqarnissaa pisariaqartippara, Naaja Nathanielsen oqarpoq.
AAMMA ATUARUK Kinguaassiutitigut pinerluuteqarsimasut inissiisarfimmiilernissaminnut inuiaqatigiinni akuusartut
Taassuma kisitsisit aamma pineqaatissinneqarsimasut agguaqatigiissillugu qanoq sivisutigisumik utaqqisarneri sumilu ajornartorsiut aallaaveqarnersoq maanna misissuiffigilluarniarpai.
Inatsiseqarnermut ministereqarfiup suliaq aallartitaa qanoq ingerlanersoq, Naaja Nathanielsenip ilisimanngilaa. Taassumali Nick Hækkerupimit akissuteqartoqarnissaaa qilanaaralugu oqaatigaa.
Maanna ukioq ataaseq qaangiuppoq, utaqqisulli ikilinngillat. Ministerimut uparuaaniarpit?
- Allattorsimaffik misissorniarpara soorlu taamaattoqarnersoq paasiniarlugu. Paasissutissat tamarmik ilisimatinnagit uparuaanissaq siusippallaarpoq.
- Pissutsinili nikittoqanngitsoq malugigukku pissutsillu iliuuseqarfigineqanngippata taama isornartorsiuinissamut tunngavissaqassaaq, Naaja Nathanielsen oqarpoq.
