Pineqaatinneqarsimasut atornerluisartut katsorsarneqartalissapput
Suliniulli kinguaattooqqavoq, tassami Frederiksberg Centerip Pinerluttunik Isumaginnittoqarfimmik suleqateqarnissaminik isumaqatigiissutini taamaatippaa, taannami suliaminik Nunatsinni unitsitsereersimalerami.
Inissiisarfimmiittut katsorsarneqartalernissaannik, Katsorsaavik maanna isumaqatigiissuteqarfigineqartoq, Pinerluttunik Isumaginnittoqarfimmi pisortap, Thomas Nicolaisenip ilisimatitsissutigaa.
Katsorsaanissat siulliit Ilulissani Nuummilu aggustimi neqeroorutigineqassapput, Aasiannilu namminersortumit aallartimisaarneqareerlutik. Kingusinnerusukkut sinerissamut angalasunit katsorsaasoqartalernissaa eqqarsaataavoq.
- Katsorsaasalernissap aallartilluarnissaa ilimagaarput, katsorsartittullu inissiisarfimmiikkunnaaraangamik katsorsartinnertik nangeqqissinnaavaat. Sapinngisamik oqitsumik ikaarsaariartoqarsinnaanissaa pilersaarutigaarput, taamaammat Nunatsinni katsorsaavinnik isumaqatigiissuteqarnerput aamma pingaaruteqarpoq, Thomas Nicolaisen Radioaviisimut oqarpoq.
Danmarkimi inatsisinik atortitsinermut ministerip, Morten Bødskovip, atornerluisartut katsorsartinneqartalernissaannut Nuummi Ilulissanilu apriilimi neqerooruteqartalernissaq ilimagalugu, Folketingimut siusinnerusukkut ilisimatitsissutigaa. Tamannali aggustimi tassa pisussanngorpoq.
Inissiisarfimmiitut qassit katsorsartikkusunnersut qaammatip tulliani paasinarsissaaq.