Pinaveersaartitsisoqartariaqarpoq
2009-mi parnaarussiviit pillugit ilisimasanik katersuiviup Tuluit Nunaanniittup misissuisimanerani erserpoq nunanit 223-usunit normu 24-iusugut.
Pinerluttunik isumaginnittoqarfimmi pisortap tullia Michael Stage ersarissumik nassuiaatissaqanngilaq, sooq taama qaffasitsigisumi Nunatta inissisimaneranut. Pissutaaqataasinnaasulli arlallit tikkuarpai.
- Takusinnaasakka malillugit pinaveersaartitsiniarluni sulinissaq ukiorpassuarni eqiingaffigineqarsimanngilaq. Soorlu malugisaqaraanni inuusuttuarannguullutik pinerlunniarniartalersut, siunnersortariaqarput iluamik aallaqqullugit pinerluttunik isumaginnittoqarfik inatsisinillu unioqqutitsinerit apuuffiginnginnerini. Taannaasinnaavoq. Aamma aappaatut: takusinnaasakka malillugit atornerluisunik katsorsaaneq Kalaallit Nunaanni assut amigaatigineqarpoq. Intasisinimmi unioqqutitsinerit amerlanerpaarpaartaat suliarineqartarput imigassartorsimatilluni imaluunniit hash-imik pujortarsimalluni. Tamanna eqqarsaatigigaanni Kalaallit Nunaanni katsorsartittarfiit ikittuaraanerat tupinnarpoq.
Kisitsisit maanna saqqummiunneqartut 2009-mili kisitsisaatineerput. Ullumikkut misissuisoqaraluarpat suli ajornerusimassagaluarput.
- Inissisimaffitsinniit appariarsimanavianngikkaluarpugut. Arlaleriarlutami utaqqisoqarpallaarnera pillugu Kangerlussuarmi isertitsisarfimmik ammaasarsimavugut, qujanartumillu maanna utaqqisut ikittuinnanngorsimapput. 2001-imiilli isertitsivinni inissaatigut 74-niit 196-nut qaffassimavagut. Nunamut taama inukitsigisumut qaffaaneq annertoqaaq.
Nunanut avannarlernut naleqqiulluni Kalaallit Nunaat sakkortuumik pillaasanngilaq killormulli sakkukinnerusumik.
- Maani isertitsiviliartinneqassagaanni pinerlunneq sakkortunerulaassaaq, aamma inissinneqartarneq sivikinnerusarpoq. Allattorsimaffimmi inissisimanitta qaffasinneranut tamakku pisuutinneqarsinnaanngillat.
Pinerluttunik isumaginnittoqarfimmi pisortap tullia isumaqarpoq, maani peqqinnissaqarfik, katsorsaasarfiit, isumaginnittoqarfiillu pinaveersaartitsinermik suleqatigiinnerusariaqartut.
Pinerlunniartarnerup akiorniarneqarnera eqqartortillugu ilanngussinnaavarput Siumup folketingimut ilaasortaatitaa Doris jacobsen inatsisinik atortitsinermut ministerimut allakkatigut marlunnik apeqquteqarsimammat.
Doris Jakobsen nalunaajaammik perusuppoq ukiuni marlunni singernermut ikkuttakkanik Nuummi misiligaaneqassappat qanoq akeqassanersoq.
Aamma paaserusuppaa pinerlunnernik pinaveersaartitsineq maani qanoq atorneqartiginersoq, pinerlutsaalisitsisut inegrlanneqarnerat qanoq akeqarnersoq qanorlu akulikitsigisumik ataatsimiittarnersut.
