Pilersuisup pisortaata akikilliliinertik utoqqatsissutigaa, kukkusumilli iliuuseqarsimanatik isumaqarpoq
- Nuummi sapaatip akunnerata naanerani kingullermi niuffatsitsinitta kingorna qisuariaatigineqartut assut ajuusaarutigineri oqaatigeqqaarlara. Arlaannaatigulluunniimmi uukapaatitsinissarput siunertarinikuunngilarput. Isumaqarpungalu aamma taamaaliorata.
Pilersuisup pisortaa, Brian Weuge Chemnitz Pilersuisup Nuummi akikilliliinerata kingorna isornartorsiuisoqareersorlu oqarpoq.
Pilersuisup illoqarfiit pingaarnerpaani pisiarfeqarani akinik nalinginnaanngitsunik akeqartitsilluni tuniniaanissaminik aalajangersimanera isornartorsiorneqarpoq.
Assersuutigalugu puussiaq atisanik ulikkaarlugu 10 koruuniliinnarlugu pisiarineqarsinnaavoq, aamma naak taanna nioqqutissanik 1000-it sinnerlugit akeqaraluartunik ilaqaraluartut.
Nunatsinni nunaqarfiit peqatigiiffiata siulittaasuata, Karl Petersenip nioqqutissat nunaqarfinni akikinninngorlugit tunineqarsimassagaluartut KNR-imut oqaatigaa.
- Nunaqarfiit akikilleerujussuartoqartillugu minitaajuaannarnerat akuersaarneqarsinnaanngilaq, siulittaasoq oqarpoq.
Nunaqarfinni akikillineqartut
Brian Weuge Chemnitzip oqarnera naapertorlugu Pilersuisup nioqqutissat nunaqarfinni niuertarfimminni tuniniaqqaarsimagaluarpai.
- Nioqqutissat uku nunaqarfiit niuertarfiini akikilleqqaqqaarpagut. Siorna aasami nunaqarfinni akikilliliivugut, niuertarfiit ilaat nioqqutissanik ukuninnga tunisaqarniarlutik akikilliliipput, taanna oqarpoq, nangillunilu:
- Nioqqutissat Nuummut nassiunneqartut qaammatini aqqaneq marlunni sivisunerusumiilluunnit nunaqarfinni pisiarineqarnikuungillat. Taamaammat sumiiffigisaanni tunineqarsinnaanngitsut nalilerparput.
KNI nioqqutissanik amerlavallaartunik imaluunniit kukkusunik tunisinnaanngisaminillu pisisimasoq taassuma nassuiaatigaa. Akikillileersuarnerlu nioqqutissanik uninngaannarunnaarsitsiniarnerusoq oqaatigaa.
Nuummilu inuttunerunera pissutigalugu Nuummi akikilliliisoqartoq Brian Weuge Chemnitzip paasissutissiissutigaa.
- Pisiarsinnaasoqassusaa anneruvoq, taamaammallu nioqqutissat nuutsinneqaqqigatik piffissami ataatsikkut tunineqarsinnaanissaasa qulakkeernissaanut periarfissaqarnerulluni, pisortaq oqarpoq.
10.000 koruunit tikillugit sipaaruteqartoq
Ungaaq Kleist Lundbland Nuummi sapaatip akunnerata naanerani pisiaqarluartut ilagaat. Taanna 160 koruunimut pisivoq, taassumalu nioqqutissat 10.000 koruunit tungaannut akeqarsimassagaluartut naatsorsorpaa.
Taanna Alluitsup Paani nammineq najugaqarnikuuvoq, taamaammallu Pilersuisup akigitittagai ilisimalluarpai, taassumalu nioqqutissat qanoq akikitsiginerat tupaallaatigilluinnarpaa.
- Tupannarpoq taamatut akikilliliimmata maani, taanna KNR-imut oqarpoq.
Taamali misigisimasariaqanngitsoq, Brian Weuge Chemnitz isumaqarpoq.
Taassuma Pilersuisup ukiuni kingullerni marlunnit pingasunut nioqqutissat akikilliartortissimagai paasissutissiissutigigaa. Maannalu akit aamma appaqqinneqarlutik.
- Nioqqutissat maanna nunaqarfinni akikillinerulissavagut, taamaaliornikkut illoqarfinnut annerusunut assartortariaqassanatigit, Brian Weuge Chemnitz oqarpoq.
Pilersuisup Nuummi akikilliliinissamik aalajangernera inuppassuit Facebookikkut uparuartuutigaat.
Pilersuisup isornartorsiuineq tusaagaa Nuummilu assingusumik akikillileeqqinnissaminik pilersaaruteqanngikkallartoq Brian Weuge Chemnitzip oqaatigaa.
- Akikilliliinernik allanik pilersaaruteqanngilagut, aamma taama akikillileeqqinnissarput pisariaqarteqqissanagu neriuutigaarput. Nioqqutissat nunaqarfinni sapinngisamik tuniniartarpagut.
- Kisianni piffissap ingerlanerani taamaaliortoqaqqissinnaanissaata pisariaqarsinnaanera mattussinnaanngilarput, Brian Weuge Chemnitz oqarpoq.
Taassuma oqarnera naapertorlugu pisiarfitik tamarmik piffissami matumani akikillileeqattaarlutik niueruteqarluarput.