Ungaaq Kleist Lundblad Pilersuisup akikilliliinerani 10.000 koruuninik sipaaruteqartoq

​Nuummiut Pilersuisoq katersortarfimmi sapaatip akunnerata kingulliup naanerani akikillileersuaarnerani sipaaruteqangaatsiarnerisa kingorna Pilersuisoq qissaarnalaartumi inissisimalerpoq.

Pilersuisoq Nuummi allanik pisiniarfippassuaqareersuni pisiniarfeqanngimmat Nuummi akikilliliinera isornartorsiuteqangaatsiarpoq. Nioqqutissallumi nalinginnaanngitsumik akikilluinnarput.

- Soorlu una katersortarfimmi puussiamut ikeqataavoq imatut naleqanngilaq 10 koruunilinnut ilaavoq, Nanortalimmiikkaluaruniligooq 1.200-qassagaluarpoq, Ungaaq Lundblad kavaajamik takutitsiutaa oqarpoq.

Taanna nammineq Alluitsup Paani najugaqarnikuuvoq, taamaammallu Pilersuisup akigitittagai ilisimalluarpai. Taanna sapaatip akunnerata naanerani akikilliliisoqarnerani sipaaruteqangaatsiartunut ilaavoq.

Ungaaq Kleist Lundblad katillugu 160 koruunit nalinganut pisivoq, taassumalu 10.000 koruunit tikillugit sipaarutigisimassallugit nammineq naatsorsorpaa.

- Takunikuunnginnama nikingarujussuarput tassami tupannarpoq taamatut akikilliliimmata maani, taanna oqarpoq.

Akuersaarneqarsinnaanngitsoq
Nunatsinni nunaqarfiit peqatigiiffiata siulittaasuata, Karl Petersenip Nuummi akikilliliisoqarneranut malinnaasimalluni paasissutissiissutigaa, taannalu inoqutinut attaveqaatitigut kingorna isornartorsiuivoq.

Taassuma nunaqarfinni pisisartut atisanik puussiamut 10 koruuniliillutik pisisinnaatinnagit Nuummi akikitsunngorlugit tunineqarnerat tupigusuutigaa.

-Tassami KNI-p eqqaamasariaqarpaa akit qaffanikuupput suli aamma qaffattussaallutik taamaattumillu akikilliliineq taanna akuersaaruminaappoq illoqarfimmi Pilersuisoqarfiunngitsumi ingammik.

Taassuma Pilersuisup tulliani akikillileerujussuarnissamini nunaqarfiit eqqarsaatigeqquai.

- Nunaqarfiit akikilleerujussuartoqartillugu minitaajuaannarnerat akuersaarneqarsinnaanngilaq, Karl Petersen oqarpoq.

- Nunaqarfiit minitaajuartarnerat taanna akuersaarsinnaanngilarput, Karl Petersen oqarpoq.

Inuit kamannerat paasisinnaagaa
Ungaaq Kleistip siulittaasoq isumaqatigaa.

Pilersuisup akikilliliinini allatut aaqqissuussinnaagaluaraa taanna isumaqarpoq.

- Nuummukaatinnginnerani akikilleqqaarlugit nunaqarfimminni tassa uanga isumaqaraluarpunga nunaqarfimminni akikilleqqaarsimasussaagaaluaraat paasinarujussuarput tassami soorlu facebookkikkut kamassimaarrammata paasinarujussuarput.

Taassuma akikilliliinermi minutsit qulit kingulliit puussiaq ulikkaarlugu 10 koruunilerneqarsinnaanerarpaa.

Ungaaq Kleist Lundbladillu akeqanngitsumik tiguinnarneqarsinnaasut tigusimasani aamma takutippai.

- Anisarfiup eqqaani karsimik tigusiffigiinnarneqarsinnaasoqarpoq. Taakku akeqanngitsumik tiguinnarpakka.