Pilersuisup pisiniarfiinut nioqqutissanik pilersuisoq akiliisinnaajunnaartoq
Danmarkimi tusagassiorfiit arlallit taama allaaserisaqarput.
Suliffeqarfik nunatsinni niuerfimmut inuussutissanik allanillu nioqqutissanik 300-nik kalaallisut danskisullu allagartalersukkanik pilersuisuuvoq.
Tamannali tamaanga killeqarpoq. Senobis ingerlatseqatigiiffillu suleqatigisaa Euro-Outlets Næstvedimi Pigisanik agguaassisarnermut eqqartuussivimmi akiliisinnaajunnaartutut nalunaarutigineqarpoq.
AAMMA ATUARUK KNI ilimagisamisut ukiup affaani siullermi naatsorsuutimigut angusaqartoq
- Ingerlatseqatigiiffiit ingerlateqqinnissaannut aningaasat pisariaqartut pissarsiarisinnaasimanngilagut, piginnittoq Thomas Skov Nielsen nittartakkamut Sjællandske Medierimut taama oqarpoq.
Suliffeqarfik Senobis Danmarkimi suliffeqarfinnut piffissap sivikitsup iluani siuariartupiloorsimasunut nersornaammik Gazellemik siorna novembarip qaammataani tunineqarpoq.
Pilersuisup pisiniarfiinut nioqqutissanik "Pitsaasut"-nik taaguutilinnik pilersuinerup matunerata saniatigut sulisut 100-t missaanniittut suliffitik annaavaat.
