Pilersuisup amigaateqartuarnera naammagittaalliuutigineqarpoq
KNI kiffartuussinermut isumaqatigiissut naapertorlugu pisussaagaluarpoq, nunaqarfiit isorliunerusullu pisiassanik aalajangersimasunik pilersussallugit. Tassalu meeraaqqaat imuttugassaat tamakkununnga ilaavoq.
Tora Jeberg KNI-mut 2009-mili naammagittaalliortarsimavoq.
- Massakkorpiaq erloqinartutut isigaara, meeraaqqat immuttugassaannik sapaatit akunnerisa siulianni nunguutsimmata. Inuussutissaq taanna naalungiarsuit sisamat ataallugit qaammatillit pinngitsoorsinnaanngilaat. Taava paasisinnaanngilluinnarpara, maani pigiunnaarsinnaammassuk, uffa allamik periarfissaaqanngitsugut, Tora Jeberg oqarpoq.
Taanna Kangaatsiap peqqinnissaqarfiani peqqissaaassuuvoq. Aappani ernertillu arfineq-pingasunik qaammatilik Kangaatsiameeqatigai.
Pilersuisumut arlaleriaqaluni saaffiginnittaraluarsimavoq, misigisimallunili pisiniarfimmi sulisunit, pisiniarfiup ittuanik allaniilluunnit qutsinnerusumik inissisimasunit tusaaneqarani.
- Aarlaannaalluunniit iluamik iliuuseqanngimmat Kangaatsiami tuniniaarnermut pisortamut Sisimiuniittumut sianerpunga, taannalu nassuiaallugu, ernera kisiat eqqarsaatiginngikkinga. Nassuiaappara, illoqarfimmi peqqissaasuullunga, aperaaralu anaanamik mulimigut aseruuttoornilimmik takkuttoqaraluarpat qanoq iliussanerlunga? Taavami allatut ajornartormik Aasianni napparsimmaavimmukartittariaqarparput, Tora Jeberg oqarpoq.
Meeraaqqat immussaat kisimik amingaataanngillat. Naalungiarsuit assigiinngiiaartunik nerisaqartinnissaat ajornarluinnarpoq, meeraaqqat nerisassaat pisiassat ataasiinnaammata. Taamaapporlu naak Pilersuisup
pisiassaataasa ikinnerpaaffissaattut allattorsimaffik naapertorlugu assigiinngiiaartunik pisiassaqartussaagaluartoq.
Aamma meeraaqqat nerisassaannut pisiassanut taartaassinnaasunik nammineq iganik ajornarpoq, akussai gluteneqanngitsut Kangaatsiami pigineqanngimmata.
Tora Jeberg Kalaallit Nunaanni nerisaqarnermut Siunnersuisoqatigiinnut maanna nammagittaalliorpoq, nammineq saaffiginnissutini kinguneqarneq ajormata, neriulluni taakkua qanoq iliuuseqarsinnaasut
- Erloqilluinnalerama. Nassuerutigissavara allaat pisiniarfimmi qianikuugama. Qanormi iliussagama? Oqarfigaakka, ”Ernerma immuk literip sisamararterutaa pingajut ullormut imertartussagaa, ilissilu suuteqarasi”, Tora Jeberg oqaluttuarpoq.
Taassuma oqaasii nerisaqarnermut siunnersuisooqatigiinniit paasilluarneqarput.
- Pitsaarpasinngilaq. Inuussutissat pisariaqarluinnartut amigaatappata aaqqiiiffigineqartariqarpoq, siunnersuisooqatigiit siulittaasuat, Gert Mulvad oqarpoq.
Siunnersuisoqatigiimi qanoq iliorsinnaappat?
- Pisisartoq soorlu iliorsimasoq, uagut aamma pissutsit tikkuarsinnaavagut. Taava aamma Naalakkersuisut, nerisassamik pilersuinissamik isumaqatigiissuteqartut, aamma oqaloqatigineqartariaqarput, Gert Mulvad oqarpoq.
Pilersuisup pisortaata Frederik Olsenip ajuusaarutigaa nioqqutissanik Kangaatsiami amikkittoortoqarmat, tamannalu assigiinngitsunik pissuteqartoq oqaatigalugu.
