Pilersuisoq suli aningaasartuutikillisaassaaq

 - Pilersuisoq imaassinnaavoq siunissami allanngortoq. Suleriaatsit periaatsillu immaqa siunissami allanngortittariaqassapput, unammilligassanut nutaanut  naleqqussarniassagatsigu, KNI-p siulersuisuni siulittaasoq Michael Skourup oqarpoq.

Pilersuisup piginnittua, KNI, ukiumi naatsorsuuseriffimmi 2010- 2011-mi  akileraarutit suli peernagit 102,2 millioni  koruuninik sinneqartooruteqarpoq. Taakkualu ukiup siuliani sinneqartoorutinut 53,4 millioni koruuninut sanilliukkaanni marloriaatingajaapput.

Kisianni taama angusarissaanissamut aqqut nuannersuinnaasimanngilaq, aamma sulisunut. Tassami KNI sulisuni ukiuni kingullerni pingasuni 100-nik ikisissimavai, ilaatigut atorfiit inuttaaruttut inuttaleqqinngiotsoortarnnerisigut ilaatigullu soraarsitsinikkut. KNI tamakkerluni 803-nik maanna sulisoqarpoq.

Suliffeqarfimmilli naleqqussaaneq tamaanga killinngitsoq, siulersuisuni siulittaasoq ilimasaarivoq.

Sullissinissamik isumaqatigiissutissaq nutaaq Namminersorlutik Oqartussanut maanna isumatigiinniutigineqarpoq, KNI-llu siunniuppaa, nunaqarfinni pisiniarfinnut kaaviaartitaginnerusunut pisiniartartut ulluinnarni sullinneqarnerat pitsaanerulissasoq.

Kisianni taava Pilersuisup pisiniarfiisa akornanni imminut tapiiffigeqattaanneq unissasoq, KNI isumaqarpoq. Tassalu pisiniarfiit isertitakinnerit pisiniarfinni isertitaqarnernit aningaasatigut ikiorneqarunnaassapput.

KNI-mmi kaaviiaartitami imminut oqimaaqatigiinnerulernissaat siunertaraa. Allatut oqaatigalugu, Pilersuisoq imminut nappassinnaanerulertariqarpoq.

Tassalu sullissinissamik isumaqatigiissutissap isumaqatigiinniutigineqarnerata kingunerilluarsinnaavaa, Pilersuisup pisiniarfiisa ilarpassuini pisiniartartut sullinneqarnera ajornerulertoq.

- Immaqa assigiinngitsut siunissami annerusumik isinginiartariaqalissavagut: Pisiassaativut nunaqarfinni suuppat? Pisiassani ataasiakkaani qanoq amerlatigisut pigaavut? Aamma ammasarfii annerusumik isiginiartariaqassavagut, KNI-p siulersuisuni siulittaasoq Michael Skourup oqarpoq.