Pilersuisoq kisermaassisuujunnaalerpoq
Aasianni kioskiutillip Sundkioskimi piginnittuusup Aron Olsenip Pilersuisoq aqqutigalugu Nuuk Imeq A/S-ip nioqqutissiaanik piniaraangami ajornaatsuinnaaneq ajortoq oqaluttuaraa.
- Pilersuisumut nioqqutissanik Nuuk Imermeersunik piniaraangatta soorlu saftinik, qaammatit marluk utaqqisinnaasarpugut, taama Aron Olsen oqarpoq.
Pilersuisorlu aqqutigalu nioqqutissanik Nuuk imermeersunik piniartarneq septembarip aallaqqaataanniit allanngortinneqartussanngortoq, Aasianni Kioskiutilimmit Aron Olsenimit iluarisimaarneqarpoq.
Taamatut allannguisoqarniarnera Kalaallit Nunaanni Brugsenimi pisortaanerup Olav Thomsenip aamma iluarisimaarpaa.
- Isumaqarpunga toqqaannartumik Nuuk Imermut pisisinnaanngornissaq septembarip aallaqqaataani atuutilersussaq pitsaalluinnartuusoq, unammilleqatigiilluarnermi pisiniartartutsinnut pitsaasuuvoq, Olav Thomsen oqarpoq.
- Periarfissarlu una atuutilersussaq pisiniartutsinnut iluaqusiissaaq, tassami Nuuk Imermit pisiassanit piniaraangatta Pilersuisoq aqqutigalugu aningaasartuuteqartarpugut, taamaattumillu aningaasartuutaarukkutta pisiassaatigut Nuuk Imermeersut akikillissapput, tamannalu pitsaalluinnartuusoq isumaqarpunga, Olav Thomsenip oqaatsini taama naggaserpai.
KNI A/S-imi attaveqarniarnermut pisortaasup Shiva Xenia Brunsvigip nalunaarutigaa tusagassiutinut sapaatip akunnerata tulliani nalunaaruteqarumaarlutik, Unammilleqatigiinnermut Ataatsimiititaliap aalajangigaa oqaaseqarfigisinnaanngikkallarnerarlugu.
