Piiaasunit tigusat sumiissusersineqarsimagunarput
Ilimagineqarpoq umiarsuaq Somaliap kangiani illoqarfiup Hobyo-p avataaniittoq.
Qallunaat imarsiortut sakkutuuisa umiarsuaat, Esbern Snare, maanna piiaasut umiarsuaata eqqaaniittoq nutaarsiassaqartitsivimmi Ritzauimi allaaserineqarpoq. Tassalu Esbern Snare-p, Somaliap imartaata killeqarfia timmut sømilinik aqqaneq-marlunnik qaangersimagaa maanna oqaatigineqarluni.
Esbern Snarip piiaasut umiarsuaat ingerlaqatigisimagunaraa, Center for Militære Studiami ilisimatooq, Lars Bangert Struwe oqarpoq:
- Nunat assigiinngitsut sakkutuuisa umiarsuaataasa killeqarfiit timmut qaangerlugit angallaffigisinnaagaat, Naalagaaffiit Peqatigiit ukiup ataatsip matuma siorna aalajangersaapput. Taamaammallu ilimanarpoq, qallunaat sakkutuuisa umiarsuaata piiaasut umiarsuaat ingerlaqatigisimassagaa, immaqa paasissutissanik nutaanik pissarsiffiginiarlugu, Lars Bangert Struwe oqarpoq.
TV2-p paasisai naapertorlugit Leopardimi umiartortut ajunngillat. Umiartortut aallarunneqarnerannit sapaatip-akunnera ataaseq maanna qaangiuppoq, taamaakkaluartoq umiarsuaatileqatigiit, Shipcraft, aamma Danmarkimi oqartussat avammut suli nalunaaruteqanngillat.
