Pihl & Sønip akiliisinnaajunnaarnera Nunatta karsianut sunniuteqarnavianngilaq
Ilulissat eqqaanni Paakitsumi erngup nukinganik nukissiorfissap tunniunneqarnissaa sanaartortitsisut eqqartuussissuserisullu ilaajaanerisa nalaanni imaassinnaavoq kinguartinneqartoq.
Ilulissat eqqaanni Paakitsumi nukissiorfiup siorna oktobarimi atorneqalersup ilaneqarnera pisortatigoortumik septembarip ulluisa arfernanni atuutilersinneqartussaagaluarpoq, piginnittulli, Namminersorlutik Oqartussat, ilaajaatitsinerat pissutaalluni nukissiorfiup septembarip arfernanni atuutilersinneqarnissaa imaassinnaavoq kinguartinneqartoq.
Sanaartugassanik suliassinneqartartut akiliisinnaajunnaarnermik nalunaaruteqarnerat pissutaalluni pilersaarutit allanngorsimanersut Nukissiorfiit aperaavut, sukumiinerusumilli suli oqaaseqarsinnaannginnerarlutik:
- Apeqqutit akissutissarsineqartussat suli amerlapput, annertunerusumillu taamaammat oqaaseqarsinnaanngikkallarluta, attaveqatigiinnermut pilersaarusiortoq Anja Rosa Qvist Nukissiorfinnit Radioaviisimut oqarpoq.
Nukissiorfiit katillugit pingasut Pihl & Sønimit Nunatsinni sanatinneqarnikuupput, allanilli aamma suliaqarnikuullutik. Assersuutigalugu Nuummi Atuarfik Hans Lynge Pihl & Sønimit sananeqarnikuuvoq.
Pihl & Sønip akiliisinnaajunnaarnerata Nunatta karsianut sunniuteqarnissaa ilimagineqanngilaq:
- Nukissiorfiit qanoq iliuuseqarnissamut piareersaateqareerput, inuiaqatigiit aningaasaliiffigisimasaasa qularnaarneqarnissaat iliuuseqarfigineqareerlutik. Suliat assigiinngitsut pillugit inatsisilerituut attaveqarfigereerpavut, isumaqatigiissutigineqarsimasut inatsisilerituunit nalilersorneqarnissaat utaqqimaarlutigu, Nukissiorfiit teknikkikkut pisortaat Peter Birk, tusagassiuutinut nalunaarummi ilaatigut allappoq.
Qorlortorsuarmi erngup nukinganik nukissiorfik pillugu eqqartuussivitsiguunngitsumik aalajangiisoqarnissaa pillugu Nukissiorfiit suliassanngortitsinikuupput, sanaartugassanilli suliassinneqartartut arlallit tassani ilaammata tamanna pillugu annertunerusumik oqaaseqarusunnatik.
Pihl & Søn nunani tamalaani suliaqarnikuuvoq, Danmarkimilu sulianut ilaapput Storebæltsbro, Københavnillu operahusia.
Danmarkimi umiarsualiviit pillugit qimuttuitsunillu angallannermut tunngasut annertuut Pihl & Sønip aamma peqataaffigigaluarpai, soorlu sulisui aningaasarsiaat pillugit assigiinngitsutigut isornartorsiorneqarluni.
