Tassaarsuaq: Pigisanik Nuugatsiami Illorsuarnilu aallernissamut piareeqqapput

Nuugaatsiami Illorsuarnilu innuttaasunut inigisaminnit qimagutsinneqarsimasunut nutaarsiassatsialak. Tassaarsuaqarneratami kingorna Issittumi Sakkutooqarfik Qaasuitsullu Kommunia inuit pigisaannik aallernissamut piareqqapput. Naalakkersuisut nittartagaanni tamanna allaaserineqarpoq.
Assi © : Arktisk Kommando/Palle Lauritsen
Allattoq Mads Lynge
juulip 08-at 2017 14:18

Qaqqap suli sisoorsinnaanissaa suli aarleqqutigineqarmat imaaliallaannaq aallertoqarsinnaanngilaq, inuillu sumiiffimmi angalannginnissaat Naalakkersuisut tusagassiuutinut nalunaarummi aamma erseqqissaatigaat.

Misiliilluni aallernissamut atatillugu tiguneqarsinnaasut taamaammat tassaapput innuttaasunut immikkut naleqartutut isigineqartut, soorlu kalaallisuut, pinnersaatit, sakkut, assit assigisaallu, umiatsiallu aalisarnermullu atortut suli atorneqarsinnaasut tiguneqarnissaat aamma misilinneqassalluni.

AAMMA ATUARUK Nunaqarfimmiut aallerusukkaluartut

Aallersinnaanissamut akuersissutit atsiorneqaqqaasssapput

Sakkutooqarfimmit kommunillu upalungaarsimasuinit angerlarsimaffimmut isertoqarsinnaaneranut, pigisallu ilaannik annaassiniarluni misiliisoqarsinnaaneranut innuttaasut ataasiakkaat pigisanik aallernissap misilinneqarnissaa sioqqullugu akuersissutinik atsiugaqaqqaassapput.

AAMMA ATUARUK Tassaarsuaqarneranit eqqugaasunut 1,6 mio. koruunit

Pigisanik aallertussat isumannaallisaaneq eqqarsaatigalugu ulorianartorsiortinneqannginnissaat suliamut atatillugu pingaarnerpaatinneqassasoq nalunaarutigineqarpoq, innuttaasullu eqqugaasut tamanna pillugu tamakkerlutik ikiorneqarsinnaanissaat qulakkeerneqarsinnaanngitsoq erseqqissaatigineqarluni.

 

Pigisanik misiliilluni aallerniarneq Issittumi Sakkutooqarfimmit suliarineqassaaq kommunimi upalungaarsimasut ikiuutissallutik, najukkamilu kommunefogedit aamma ikiuutissallutik. Pisariaqartillugu illut tassaarsuup kingorna inigisaminiikkunnaarsimasut sumiiffissiniarneqarneranni taakku ikiuutissapput.