Piginneqataassutsit ikilinissaannut illuatungiliuttut akerliliipput
Naalakkersuisut siunnersuutaat naapertorlugu NunaOil uuliasiornermi akuersissutinik piginneqataassutaasa maanna 8 procentimit 12,5 procentimut annertussusillit 6 procentiinnanngortinneqassapput. NunaOil-ip pisortaa Hans Christian Olsen ippassaq oqarpoq Naalakkersuisut siunnersuutaat akuerineqassappat NunaOil-ip sunniuteqarsinnaanera annikillisinneqangaatsissasoq.
- Naalakkersuisut taama siunniussaqarnerat assorsuaq uggornarpoq, siunissarlu pillugu eqqarsaateqannginnerannik takutitsivoq. Inatsisartut Aatsitassanut Ataatsimiititaliaani ilaasortaq Inuit Ataqatigiinneersoq Naaja Nathanielsen oqarpoq.
Piginneqataassutit 6 procentiinnanngortinneqarnerisa saniatigut NunaOil-ip uuliasiornermi sulianik ingerlatitsisutut ineriartortinneqarnissaa siunissamut pilersaarutaagaluartoq Naalakkersuisut periusissiaat naapertorlugu aamma taamaativinneqassaaq. Taamaaliorneq kukkunerusoq Inuit Ataqatigiit isumaqarput.
- Taama iliorneq kukkuneruvoq, uuliasiornermimi iluaqutigisinnaasavut tamaviisa pisariaqartippavut. Matumani NunaOil kisimi eqqorneqarnavianngilaq, nunarpummi suliani tamakkunani sunneeqataasinnaanera, ilisimasanik katersisinnaanerput kiisalu inuit maanngaanneersut tamakkuninnga suliallit tigummiinnarsinnaanerat aamma pineqarput. Naaja Nathanielsen erseqqissaavoq.
NunaOil-ip kiisalu NunaOil-ip siulersuisuisa matumani oqallinnermi peqataatinneqannginnerat aamma isornartorsiorpaa.
Naalakkersuisut tusarniaanerat februaarip ulluisa arfineq-aappaanni naammassivoq. Randi Broberg Partii Inuit-neersoq pissarsiariniaraluaratsigu iluatsinngilarput.
