Piffissat piniarfiusussat kommuninit aalajangerneqartalissapput
Appat, tuttut nannut. Piffissat piniarfiusinnaasut nunatta ilaani sumiinneq apeqqutaalluni naleqqunneq ajorput.
Taamaammat piniakkanik aqutsineq kommninut nutaanut sisamanut suliassanngortunneqartariaqartoq, Inuit Ataqatigiinneersoq Harald Bianco aamma Kattusseqatigiit Partiianneersoq Jakob Skade siunnersuuteqarput.
- Timmissat manniliorfissaat qaammatinik arlalinik sioqqullugu aammalu nunap ilaa suli ukiuusoq timmissat piniagaajunnaarparput. Taava inuit ugguartarput ajuaraluarnerarlugu. Tassalu nunatta immikkoortuini tamanna eqqartorneqarpoq, tamannaluuna allanngortikkusukkiput, Jakob Skade oqarpoq.
Naak assersuutigalugu Kujataani Avannaanilu qaqugukkut appaqartarnera assigiinngikkaluartoq, piniarneq ullumikkut nuna tamakkerlugu assigiimmit malittarisassaqartinneqarpoq.
Allannguinissamik siunnersuut Inatsisartuni ullumi siullermeerneqarpoq. sumiiffinni piniarnermik aqutsisoqalerpat, piniakkat sumiiffiit akimorlugit ingerlaartartut nungukkiartulernissaat, Demokraatineeersut Michael Rosingip isumakuluutigaa:
- Sumiiffinni ataasiakkaani aqutsisut piniagassiissutitik qaffarataannaavaat, aqutsiffiusut sanilitik eqqarsaatiginagit. Nunatsinni piniagassat assigiinngitsorpassuit sumiiffiit akimorlugit uumaffeqarput, aammalu ilarpassui ilaatigut nunani allani uumaffeqartarlutik, assersuutigalugu Tunumi nannut Norgep ilaani aamma uumaffeqartartut, Michael Rosing oqarpoq.
Timmissat pillugit suleqatigiisitat naalakkersuisunit pilersinneqarsimasut 22008-mi nalunaarusiaminni Michael Rosingitulli isumakuluuteqarput. Timmissat ilarpasui nunanit allaniit tikittartuummata, taakkunannga piniarneq qitiusumiit aqunneqartariaqartoq, suleqatigiisitaq isumaqarpoq.
Piniarnermut naalakkersuisoq, Ane Hansen, erseqqissaavoq piniarnerup nungusaataannginnissaa Naalakklersuisuut aallaavigiuarmassut. Aamma oqarpoq, piffissat piniarfiusussat Naalakkersuisut maannakkut kommuninut aalajangigassanngortissinnaareeraat.
- Kisianni nunap imikkoortortakkaartumik aqutsineq kommunalbestyrelsenut piginnaatitsinikkut tunniunnissaa periarfissatut Naalakkersuisunit isigivarput, piniarnermut naalakkersuisoq oqarpoq. Taassumali aamma Demokraatineersup Michael Rosingip isumakuluutaa paasilluarsinnaavaa.
- Peqassuserli mianeralugu aaqqissuussisoqarsinnaavoq, nunap immikkoortuani piniakkat suut qaqugukkullu takkusimaartarnerat ilutigalugu naammaginartumik aqutsisoqarsinnaalluni, Ane Hansen oqarpoq.
Siunnersuut partiinit tamanit Naalakkersuisunillu tapersersorneqarpoq taavalu aalisarnermut, piniarnermut aalisarnermut nunalerinermullu ataatsimiititaliami suliarineqassalluni. Kisianni kommuninik iluarsaaqqinnermik sulineq piffissaqarfigineqartariaqarmat Naalakkersuisut suliaq 2011-mi aatsaat naammassissavaat.
