Piareersarluannginneq ajunaassutaasinnaavoq

Nunatsinni Politiit ujaasinernik 70-init amerlanerusunik 2015-imi suliaqarput. 2016-imilu nunami imaanilu ujaasinerpassuarnik aamma suliaqarlutik, tamannalu inuiaqatigiinnut aningaasartuutaasinnaaqaaq, Nunatsinni politiit unnerluussisussaatitaasuat Adam Fischermann nassuiaavoq.

- Ujaasineq isumalluutinik atuiffiungaatsiarsinnaavoq aammalumi ujaarineqartumut inuiaqatigiinnullu akisoorujussuusinnaalluni.

Aamma atuaruk Angallatip orsussaarunnera ujaasinermik kinguneqarpoq

Politiit angallammik qulimiguulimmillu attartorlutik ujaasisariaqarunik ujaasineq 105.000 koruunit missaannik akeqarsinnaavoq. Akiinnaanngilarli, inuummi inuuneranik aamma naleqarsinnaavoq.

- Qanoq iliornissamik maleruagassat pisariaqartut malinneqanngikkaangata, inuup inuuneranik naleqarsinnaanerata saniatigut, ujaasinerit oqartussat, politiit taakkunani ilaallutik, isumalluutaannik atuisarput, suliaannillu pingaarutilinnik unitsitsisarlutik. Allatullu ajornavissumi ujaasineq pisariaqanngitsoq suliamut pingaavissumut allamut kinguarsaasinnaavoq, politiiniit unnerluussisussaatitaasoq Adam Fischermann politiit tusagassiuutinut nalunaarutaanni oqarpoq.

Ujaasinerit qanoq ittuusinnaanerini ataani atuarsinnaavatit

Attaveqaateqarnissaq aamma pingaaruteqarpoq. Ujaarineqarsimasummi qanoq sivisutigisumik peqannginniarnerlutik utereernerlutilluunniit qanigisaminnut oqaluttuarsimanngitsut, politiit arlaleriarlutik naammattoortarpaat.

Aamma atuaruk Aavariap ujaarineqartup pisani marluk 40 kilometerit ingerlassimagai

Ujaasisarnerpassuillu pinngitsoortinneqarsinnaagaluartut aallaavigalugit kangerlummut aallassanermi qaqqamulluunniit pisuttualernermi suut pisariaqarnersut politiit najoqqutassamik sanapput.

- Kisimiinnak

- Angalaarnissannut oqorsaatissannik atisassamaateqarit

- Saniatigut allanik taquaqarit

- GPS-imik VHF-radiomillu angallanneqarsinnaasunik nassarit

- Angalanissamut immap nunallu assinganik nassarit aqqutissallu malillugu

- Aniguiniarnermut atortorissaarutinik nassarit. Makkuusinnaapput: ajunaalernermi kalerrisaarutit, ulik qillaalasoq, ulissuaq aappalunngusersoq, innerit, aalisarnermut atortut, tarrarsuut seqinnernerani kalerrisaarutaasinnaasoq, mattutit il.il.

- Angalaalerlutik sumukalernerlutillu arlaannut oqaatigiuk.

 - Kinguuaattooruit kalerriigit.

Nunatsinni Politiit 2015-imi annaassiniarnerminnit assersuutinik kakkiussipput:

Aalakoorluni umiatsiaarartup mallersorujussuarmi annaanneqarnera

2015-imi septembarip qaammataani unnummi nillertumi kujataani illoqarfeeqqami unnussiuaartoqarpoq. Unnussiuaareernerup kingorna angut inuusuttoq – aalakoortorujussuusoq – angutip allap umiatsiaa atorlugu aallarniarluni aalajangerpoq.

Umiatsiap inuttaata umiatsiani peqanngitsoq paasivaa, tillinneqarsimasoq arlaallu aallarsimasoq pasittappaa. Kinguneratigullu ujaasinerujussuarmik aallartitsisoqarpoq, umiatsiaq aalakoortumit aallassutigineqarsimanissaa politiinit ernummatigineqarmat. Umiatsiaq erngertumik nassaarineqanngimmat, umiatsianik marlunnik Qaqortumiit Nanortalimmiillu attartortoqarpoq, ullorlu naallugu sumiiffimi annertuumi ujaarsisoqarluni. Qulimiguulillu ujaasinermi aamma atorneqarpoq.

Nunami ujaasineq aamma ingerlanneqarpoq, umiatsiaq kimit aallassutigineqarsimanersoq politiit paasiniarsuaarpaat, tamannalu isumaqarpoq, umiatsiaq kimit aallassutigineqarsimaneranik ilisimannissinnaasunik inunnik assigiinngitsunik politiit arlallik piffissarujussuaq atorlugu oqaloqateqaqattaartut.

Angut inuusuttoq aallarsimasoq ullaakkut iterpoq, nunamillu takusaqarsinnaannginnami paasivaa tippussaangaatsiarsimalluni.

Piffissaq sivikitsoq ingerlareersoq umiatsiaq orsueruppoq, umiatsiamilu ajornartoornermi atortussaqanngimmat, neriulluni nassaarineqassalluni tippussaarujuuginnalerpoq.

Angullu inuusuttoq imaani silami aarlerinartumi unnuivoq, malerujussuaqarmallu umiatsiaq kivisinnaammat annilaangalluni sinissinnaasimanngilaq. Ullup aappassaani qulimiguulimmik ujaasisunik nassaarineqarpoq, aatsaallu unnulersoq nunamut peqqilluni. Ujaasinermi Nunatsinni Politiini suliaqartorpassuit saniatigut umiatsianik qulimiguulimmillu attartorluni ujaasititsinermut aningaasat 105.000 koruunit missaat atorneqarput. Taakkulu aningaasat angummut taarseqquneqarput.

Annanneqarusullutik atisatik ikuallattariaqaraat

Inuusuttut aappariit nunaqarfimmut najugarisaminnut angerlarniarlutik Maniitsumiit 2015-imi februaarip qaammataani ualisoq umiatsiamik aallarput.

Sila atoruminarpoq, aperujussuarmallu erseqqarinngilaq. Tamannalu ilutigalugu sila aamma nillertorujussuuvoq, minus 20 gradit missaanik issilluni. Aappariit Maniitsumiit nal. sisamat missaanni aallarput, nalunaaqutarlu tallimat missaanni oqarasuaataat attavinippoq, pilersaarutertillu ajunngitsumik ingerlasoq ilaquttaminnut kalerriutigaat.  

Attaveqanngilaq

Piffissaq malillugu tikinngimmata ilaqutaasut ernumalerput. Attaviginiarnerallu iluatsissinnaannginnamikku politiit kalerrinniarlugit aalajangerput.

Nalunaaruteqarneq politiinit tassuuguinnaq qisuariarfigineqarpoq, Aasiaat Radioalu kalerrinneqarpoq, sumiiffiullu eqqaaniittut umiarsuarsuit ujaasinermi peqataanissaanik kajumissaarneqarput. Saniatigullu politiit angallataat ujaasinissamut piareersarneqarluni.

Aappariit GPS-eqaratillu VHF-radioqanngillat, ajunaalernermilu kalerrisaarutinik nassaarineqarnissaannut iluaqutaasinnaasunik nassataqaratik.

Aappariit sumiissinnaanerannut paasissutissat annikitsuinnaat pigalugit Politiit angallataat Sisak II Maniitsumiit unnuk taanna nal. 21.00 missaani aallarpoq. Paasissutissallu annikimmata ujaasineq qanoq iluatsitsigisinnaanera nalunarsimavoq.

Atisat ikuallattut politiit angallataannit takuneqarput

Politiit angallataannit qaamaninnguit unnuap qeqqata qaangereeraa takuneqarput, akunnerullu ataatsip missaa ingerlarsoreerlutit paasivaat taakkuusut aappariit ujaarineqartut.

Angallatip motooria ajortissimavoq, sikunillu maniilasunit ikkarluppassuit tungaannut tippussaasimapput.

Aappariit periataallaqqillutik atisassamaatiminnik ikuallaasimanngitsuuppata uumatillugit nassaarineqarsimasinnaanerat qularnarpoq.

Politiit angallataannut ikimmata angutip atisai masattuinnaapput, arnarlu kisimi annanniutinik atallaaqarluni.