Angallatip orsussaarunnera ujaasinermik kinguneqarpoq
Air Greenlandip qulimiguuata Bell-212-ip angut 21-nik ukiulik sapaatiummat nassaaraa. Taanna kingullermik takuneqarpoq arfininngornerup unnuaani marlup missaani nuannaffik qimammagu.
Ujaarineqartoq nunaqarfimmiit umiatsiamik aallarsimavoq, arfininngormalli apuuffissaminut apuussimanngimmat, Kujataani Politiit ujaasineq aallartippaat.
Qulimiguulimmit politiinit ujaasitinneqartumit angut imaani ammasumi Alluitsup Paata Nanortallillu akornanniittumi tissukartoq sapaammi ualikkut sumiissusersineqarpoq.
Aamma atuaruk Angut inuusuttoq Kujataani Politiinit ujarneqarpoq
Angallammik kingorna orniguffigineqarpoq, 21-nillu ukiulik isumannaatsumik angerlaanneqarluni.
Sunaaffa angallataa orsussaarussimasoq.
Naak angut ullup unnuallu ilivitsup aappaa avillugu tissukaatsissimagaluarluni nikallorsimanngitsoq nassaarineqarsimasoq, Kujallermi Politeeqarfimmeersoq Siivaleeraq Terkelsen oqaluttuarpoq.