Piaaraluni ikuallatsitsisoqarsimanngilaq

Ilulissani ruujorilerisut suliffeqarfiat poorskip ulluani ikuallarujussuartoq qanoq aallartissimanersoq pillugu teknikerit paasiniaanertik naammassingajalerpaat - maannamullu paasisat malillugit piaaraluni ikuallatsitsisoqarsimarpasinngilaq.
Allattoq Najaaraq Egede
maajip 18-at 2011 08:30

Ikuallannermut aallartissutaasimasinnaasunik misissueqqissaarnerit suli naammassivinneqanngimmata, Avannaani Politeeqarfik annerusumik paasissutissiisinnaanngilaq.

Suliffeqarfimmi apriilip 24-ani ikuallanneq ima sakkortutigaaq allaat qaartoortoqarnissaa aarleqqutigineqaleraluarluni.Aarleqquteqarneq pillugu ikuallaffiup eqqaa 100 meterip iluaniittoq inunnit pallinneqaqqusaajunnaarsinneqarallarpoq. Nunguilluni ikuallattoqarnera pillugu ikuallassimasunik paasiniaasartut Danmarkimit aggersartariaqarsimapput.

- Ikuallassimasunik paasiniaasartut Danmarkimeersut misissuinerisa takutippaat ikuallatsitsisoqarsimaneranik maannamut pasinartoqanngitsoq, taamaammallu eqqartuussisulersuussisoqartariaqarpasigani. Ikuallanneq kiassaateqarfimmi aallartissimassangatinneqarpoq, nalunaarusiarli aatsaat tigusimaleriarutsigu nassuiaasinnaassaanga, Avannaani politikommissæri, Bo Borgnæs, KNR-imut oqarpoq.

Ikuallanneq nalunaaquttap akunnerini qulingiluani qaminniarneqartariaqarsimavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq